يورو زون کی یونان کے لیے 12 ارب یورو کی مدد
3 جولائی 2011
ہفتے کو برسلز میں17 یورپی ممالک کے وزرائے خزانہ یونان کی مدد کے لیے پانچویں قسط ادا کرنے پر متفق ہو گئے۔ مئی 2010 ء میں ان وزراء نے اتفاق کیا تھا کہ 15 جولائی 2011 سے پہلے یونان کو 110 ارب یورو کی مدد دی جائے گی۔ 8 جولائی کو بین الاقوامی مالیاتی فنڈ کا اجلاس ہونے والا ہے، جس میں اس کی باقاعدہ طور پر منظوری دی جائے گی۔
یہ پیسہ ملنے کے بعد یونان کے لیے فوری طور پر دیوالیہ ہونے کا خطرہ دور ہو جائے گا۔ اس کے باوجود ملک کو دوسرے امدادی پیکیج کی ضرورت ہے۔ یونان کو قریب 110 بلین یورو کی مزید ضرورت پڑے گی، جس پر يورو زون کے وزرائے خزانہ اگلے چند ہفتوں میں فیصلہ کریں گے۔ یونان کے وزیر خزانہ نے امید ظاہر کی ہے کہ ستمبر کے وسط تک یہ پیکج تیار ہو جائے گا۔'
اب سے لے کر ستمبر تک يورو زون کے وزرائے خزانہ دوسرے امدادی پیکیج میں پرائیویٹ سیکٹر کی شرکت کے لیے کوشش کریں گے۔ جرمنی کو امید ہے کہ کم از کم 30 ارب یورو کی رقم پرائیویٹ سیکٹر سے مل جائے گی۔ جرمن وزیر خزانہ وولف گانگ شوئبلے نے کہا، ’یونان کے لیے مدد پر تیزی سے کام جاری ہے۔ اس میں پرائیویٹ سیکٹر کو بھی شامل کیا جا رہا ہے، جو یونان کی اگلی مدد میں بڑا کردار ادا کرے گا‘۔
اس کے ساتھ ہی جرمن وزیر خزانہ نے یہ بھی کہا کہ سب کچھ اس بات پر منحصر ہے کہ یونان بچتی پروگرام سے متعلقہ اقدامات کو کتنی مستعدی سے نافذ کرتا ہے۔ امید کی جا رہی ہے کہ یونان کو پرائیویٹ سیکٹر سے 30 ارب یورو جبکہ یورپی یونین اور بین الاقوامی مالیاتی فنڈ سے 50 ارب یورو کی مدد ملے گی۔
رپورٹ: امتیاز احمد
ادارت: عاطف توقیر