نوے سال کی شدید ترین بارشیں، کراچی میں درجنوں ہلاکتیں

کراچی پولیس کے سربراہ غلام نبی میمن نے جرمن خبر رساں ادارے ڈی پی اے کو بتایا کہ منگل 25 اگست سے شروع ہونے والی یہ بارشیں اب تک کم از کم 45 افراد کی جان لے چکی ہیں۔

امدادی تنظیم ایدھی فاؤنڈیشن کے سربراہ فیصل ایدھی کے مطابق مختلف واقعات میں کم از کم 23 افراد تو صرف جمعرات کو جان سے گئے۔ کراچی کے مختلف علاقوں میں امدادی کاموں کا سلسلہ جاری ہے۔ تاہم اطلاعات ہیں کہ کئی علاقوں تک رسائی نہیں ہو سکی اور خدشہ ہے کہ ہلاکتوں کی تعداد زیادہ ہو گی۔

صوبہ سندھ کے وزیر اعلیٰ مراد علی شاہ کے مطابق امدادی کاموں میں مدد کے لیے فوج طلب کی گئی ہے جبکہ پاکستان نیوی بھی کشتیوں کے ذریعے متاثرہ افراد تک پہنچنے میں مدد دے رہی ہے۔

ہنگامی حالات سے نمٹنے والے ادارے نیشنل ڈیزاسٹر منیجمنٹ ایجنسی کے مطابق شہر میں پانی کی بلند سطح کے سبب شہر کے زیریں اور غریب علاقوں میں صورتحال مخدوش ہے۔ سندھ محکمہ موسمیات کے سربراہ سردار سرفراز کے مطابق 1931ء کے بعد کراچی میں یہ شدید ترین بارشوں کا سلسلہ ہے۔

’اتنی زیادہ خوفناک بارشیں پہلے نہیں دیکھیں‘

 مون سون کی مصیبتیں اور پاکستانیوں کا غم وغصہ

حکام کے مطابق پاکستان کے جنوبی اور جنوب مغربی حصوں میں آئندہ دو دنوں کے دوران مزید بارشوں کی توقع ہے جس کی وجہ سے مزید نقصانات کا خدشہ ہے۔

ڈی ڈبلیو کے کراچی میں نمائندے رفعت سعید کے مطابق، ''شدید بارش کے بعد شہر بھر میں پانی جمع ہو گیا اور لوگوں کے گھروں میں داخل ہو گیا۔ سڑکوں اور گلیوں میں لوگوں کی گاڑیاں پھنس کر رہ گئیں۔ تاہم ان حالات میں امدادی ادارے یا حکومتی اہلکار لوگوں کی مدد کے لیے کہیں نظر نہیں آئے۔‘‘ ان کا مزید کہنا تھا کہ سخت مشکل حالات میں لوگوں نے اپنی مدد آپ کے تحت ایک دوسرے کی مدد کی: ''پانی جمع ہوجانے کی بڑی وجہ این ڈی ایم اے کی طرف سے کراچی کے برساتی نالوں کی صفائی نہ کی جانا ہے۔ جس کی وجہ سے بارش کا پانی کا نکاس نہ ہو سکا اور شہر کے زیادہ تر حصوں میں کئی کئی فٹ پانی جمع ہو گیا۔‘‘

جولائی سے اگست کے دوران مون سون کی سالانہ بارشوں کے سبب ہر سال پاکستان اور اس کے گنجان آبادی والے دیگر ہمسایہ ممالک میں سینکڑوں افراد جان سے جاتے ہیں۔