معدے میں کوکین کی اکتالیس تھیلیاں، آسان نہیں

جرمن حکام نے بتایا ہے کہ اس تینتیس سالہ شخص کے معدے میں کوکین سے بھری اکتالیس تھیلیاں موجود تھیں اور ہر تھیلی میں کم از کم دس گرام کوکین تھی۔ یہ شخص ٹرین کے ذریعے ایمسٹرڈیم سے ہیمبرگ کے راستے کوپن ہیگن جا رہا تھا۔

جرمن کسٹم حکام نے بتایا ہے کہ جیسے ہی ٹرین نے بالٹک جزیرے فیہمان کو پار کیا تو پولیس نے اس شخص کی تلاشی لی۔ اس کے بیگ سے اٹھاون چھوٹے چھوٹے بیگ ملے، جس میں کوکین کو دبا کر رکھا گیا تھا۔ ان بیگز کا سائز کبوتر کے انڈوں کے برابر تھا۔ اس موقع پر اس منشیات کے سوداگر نے فرار ہونے کی کوشش بھی کی اور کسٹم افسر کی کلائی پر کاٹا بھی۔ تاہم اس کی یہ کوشش ناکام ہو گئی۔

حکام کی جانب سے پوچھ گچھ کے دوران اس نے تسلیم کیا کہ کوکین کی کچھ تھیلیاں اس نے نگلی بھی ہیں۔ اس کے فوری بعد ایک قریبی ہسپتال میں اسے پہنچایا گیا، جہاں ڈاکٹروں نے اس کے پیٹ سے کوکین کی تھیلیاں نکالیں۔ حکام نے بتایا ہے کہ اس شخص کے پاس نے نکلنے والی کوکین کا کل وزن تقریباً ایک کلو بنتا ہے۔