مصر میں مظاہرے جاری، ہلاکتوں کی تعداد ایک درجن سےزائد

سکیورٹی فورسز کی طرف سے مظاہرین کو منشتر کرنے کی کوششوں کے باوجود وہ التحریر اسکوائر پر اپنا قبضہ برقرار رکھے ہوئے ہیں۔ خبر رساں ادارے اے ایف پی نے بتایا ہے کہ اتوار کے دن پولیس اور ملٹری فورس نے التحریر اسکوائر سے مظاہرین کو منشتر کرنے کے لیے آنسو گیس کے گولے برسائے اور ربرکی گولیاں چلائیں لیکن وہ ہزاروں مشتعل مظاہرین کو وہاں سے ہٹانے میں کامیاب نہ ہو سکے۔ مظاہرین کا کہنا ہے کہ فوجی حکومت  ملک میں اپنا اثرورسوخ بڑھانے کی کوشش میں ہے۔

اطلاعات کے مطابق اتوار کو ان پُر تشدد جھڑپوں کے نتیجے میں تیرہ افراد مارے گئے جبکہ دو افراد ہفتہ کے دن ہلاک ہوئے۔ بتایا گیا ہے کہ ان واقعات میں زخمی ہونے والوں کی تعداد 1700 سے زائد ہو چکی ہے۔ یہ نئے مظاہرے قاہرہ کے علاوہ اسکندریہ، سوئز اور ایشون تک پھیل چکے ہیں۔ حسنی مبارک کے تیس سالہ دور اقتدار کے بعد مصر میں اٹھائیس نومبر کو پہلی مرتبہ دستور ساز اسمبلی کے لیے انتخابات کا انعقاد کیا جا رہا ہے۔ تاہم تشدد کی اس تازہ لہر نے ان انتخابات کے انعقاد کو خطرے میں ڈال دیا ہے۔

خبر رساں اداروں کے مطابق اتوار کو سکیورٹی فورسز نے کچھ دیر کے لیے التحریر اسکوائر کو مظاہرین سے خالی کرا لیا لیکن کچھ گھنٹوں بعد ہی ہزاروں کی تعداد میں مظاہرین نے دوبارہ وہاں ڈیرہ جما لیا۔ عینی شاہدین کے مطابق مظاہرین سکیورٹی فورسز پر پتھراؤ کرنے کے علاوہ پٹرول بموں سے بھی حملے کیے۔

کئی سیاسی رہنماؤں کی طرف سے انتخابات کو مؤخر کرنے کے مطالبات کے باوجود مصری کابینہ نے اتوار کو ایک ہنگامی ملاقات میں فیصلہ کیا ہے کہ انتخابات کو مؤخر نہیں کیا جائے گا۔ ان تازہ مظاہروں میں دو عشروں تک سابق صدر حسنی مبارک کے وزیر دفاع رہنے والے فیلڈ مارشل محمد طنطاوی کو نشانہ بنایا جا رہا ہے۔ مظاہرین کے بقول آرمی کونسل کے سربراہ طنطاوی ملک میں فوج کے اختیارات زیادہ سے زیادہ کرنے کے خواہاں ہیں، اس لیے انہیں اپنے عہدے سے الگ ہو جانا چاہیے۔ تاہم فوجی کونسل مظاہرین کے ان خدشات کو رد کرتی ہے۔

دریں اثناء یورپی یونین کے خارجہ امور کی سربراہ کیتھرین ایشٹن نے مصر کی صورتحال پر تحفظات کا اظہار کرتے ہوئے فوجی حکومت پر زور دیا ہے کہ وہ تشدد کا راستہ ترک کر دے، ’میں زور دیتی ہوں کہ صبر وتحمل کا مظاہرہ کیا جائے۔ میں اس تشدد کی کڑے الفاظ میں مذمت کرتی ہوں۔‘

رپورٹ: عاطف بلوچ

ادارت: ندیم گِل