مصباح الحق قومی کرکٹ ٹیم کے کوچ بننے کی دوڑ میں شامل

پاکستان کرکٹ ٹیم کے سابق کپتان مصباح الحق نے کرکٹ کمیٹی سے مستعفی ہونے کے بعد پاکستان کرکٹ بورڈ کے ڈائریکٹر ذاکر خان کو اپنے اس فیصلے کے بارے میں بتایا تھا کہ وہ قومی کرکٹ ٹیم کے ہیڈ کوچ کے عہدے میں دلچسپی رکھتے ہیں۔ مصباح کے مطابق انہوں نے ہیڈ کوچ کے عہدے کے لیے درخواست جمع کرا دی ہے۔

پاکستان کے مڈل آرڈر بلے باز مصباح الحق نے اپنے بیان میں مزید کہا کہ وہ اس بات سے بخوبی واقف ہیں کہ اس چیلنجگ عہدے کے لیے انتہائی قابل اور اہلیت رکھنے والی شخصیات بھی درخواستیں جمع کرا رہی ہیں۔

پاکستان کی ون ڈے کرکٹ کا مستقبل تابناک ہے، مصباح

مصباح الحق نے اس بات کا اعتراف کرتے ہوئے کہا کہ پاکستان ٹیم کی کوچنگ ہر کسی کا خواب ہوتا ہے اور یہ تمام فارمیٹس میں انتہائی اہم عہدہ ہوتا ہے۔ 

آئندہ ماہ سری لنکن ٹیم کی پاکستان آمد سے قبل پاکستان کرکٹ بورڈ کی جانب سے اس حوالے سے فیصلہ کر دیا جائے گا۔

ورلڈ کپ 2019ء کے بعد پاکستان کرکٹ بورڈ نے ہیڈ کوچ مکی آرتھر، بیٹنگ کوچ گرانٹ فلاوور اور بالنگ کوچ اظہر محمود کی ملازمت میں توسیع نہ کرنے کا فیصلہ کیا تھا۔

واضح رہے مکی آرتھر کی کوچنگ میں پاکستان نے چیمپئنز ٹرافی جیتی اور قومی ٹیم ٹی ٹوئنٹی کرکٹ میں نمبر ون پوزیشن پر بھی رہی۔ تاہم رواں برس انگلینڈ اور ویلز میں کھیلے گئے ورلڈ کپ میں پاکستان ناقص نیٹ رن ریٹ کی وجہ سے سیمی فائنل تک کوالیفائی نہیں کر سکا تھا۔

ع آ / ع س (اے پی)