’مجاہدین خلق‘ مزید دہشت گرد گروپ نہیں، امریکا

واشنگٹن میں وزارت خارجہ کی جانب سے جاری کردہ ایک بیان کے مطابق یہ بات بھی مجاہدین خلق (MEK) کے حق میں جاتی ہے کہ اُنہوں نے ایران کے ساتھ ملنے والی عراقی سرحد کے قریب اپنا نیم فوجی اڈہ ’کیمپ اشرف‘ پر امن طریقے سے چھوڑ دیا ہے۔ اس طرح مجاہدین خلق کے امریکا میں منجمد اثاثے پھر سے بحال ہو گئے ہیں۔

اس امریکی فیصلے کے نتیجے میں گزشتہ کئی برسوں سے امریکی اور یورپی عدالتوں کے ذریعے لڑی جا رہی ایک قانونی جنگ اپنے اختتام کو پہنچ گئی ہے۔ یہ فیصلہ ایک امریکی اپیلز کورٹ کی طرف سے دی گئی یکم اکتوبر تک کی اُس مہلت کے خاتمے سے چند ہی روز پہلے سامنے آیا ہے، جس میں کہا گیا تھا کہ امریکی وزیر خارجہ ہلیری کلنٹن کو ہر صورت میں اس گروپ کی قسمت کا فیصلہ کر دینا چاہیے۔

مجاہدین خلق کا ہیڈکوارٹر پیرس میں ہے۔ اس گروپ نے اپنا نام اس فہرست سے نکلوانے کے لیے اثر و رسوخ بھی استعمال کیا ہے اور پیسہ بھی بہت خرچ کیا ہے۔ پیرس سے ایک بیان میں مجاہدین خلق کی رہنما مریم رجوی نے کلنٹن کے اس فیصلے کا خیر مقدم کیا ہے۔ رجوی کے مطابق ’مجاہدین خلق کا نام دہشت گرد گروپوں کی امریکی فہرست سے ہٹا دینے کا فیصلہ ایک درست فیصلہ ہے، جو جمہوریت کے لیے ایرانی عوام کی کوششوں کی راہ میں حائل ایک بڑی رکاوٹ دور کرنے کے لیے بہت پہلے ہو جانا چاہیے تھا‘۔

بائیں بازو کے اس گروپ کی بنیاد 60ء کے عشرے میں شاہ ایران کی مخالفت کے لیے ڈالی گئی تھی تاہم 1979ء کے اسلامی انقلاب کے بعد اس گروپ نے ایران کی مذہبی قیادت کے خلاف بھی مسلح جدوجد شروع کر دی تھی۔

واشنگٹن میں امریکی دفتر خارجہ کے باہر ’مجاہدین خلق‘ کے ارکان کا ایک گروپ ایرانی پرچم لہراتے، رقص کرتے اور فارسی زبان میں گیت گاتے ہوئے اس امریکی فیصلے پر خوشی کا اظہار کر رہا تھا۔ بار بار اس گروپ کے ارکان انگریزی زبان میں ’تھینک یُو، تھینک یُو‘ کے الفاظ بھی کہہ رہے تھے۔

اس گروپ کا کہنا ہے کہ اُس نے اپنی مسلح جدوجہد ترک کر دی ہے اور اب تہران میں اسلامی حکومت کو ہٹانے کے لیے پُر امن جدوجہد کر رہا ہے۔

واشنگٹن حکومت نے اپنے اس فیصلے میں ساتھ ہی یہ بھی کہا ہے کہ ’اس فہرست سے ’مجاہدین خلق‘ کا نام خارج کرنے کا یہ مطلب نہیں ہے کہ امریکا اس گروپ کی ماضی کی اُن سرگرمیوں کو بھول گیا ہے، جن میں 70ء کے عشرے میں ایران میں امریکی شہریوں کی ہلاکت اور 1992ء میں امریکی سرزمین پر ہونے والے ایک حملے میں اس گروپ کا ملوث ہونا شامل ہے‘۔ امریکا نے اس گروپ کو 1997ء میں ایک ’غیر ملکی دہشت گرد تنظیم‘ قرار دیتے ہوئے اس کا نام اُسی فہرست میں شامل کر لیا تھا، جس میں القاعدہ، فلسطینیوں کی حماس اور لبنان کی حزب اللہ کے نام بھی شامل ہیں۔

(aa/ai(afp