لائن آف کنٹرول پر فائرنگ کا تبادلہ، پانچ عام شہری ہلاک

خبر رساں ادارے ایسوسی ایٹڈ پريس نے بھارتی پولیس کے حوالے سے بتایا ہے کہ پونچھ سیکٹر میں پاکستانی فوجیوں کی طرف سے داغا جانے والا ایک شیل ایک گھر پر جا گرا جس کی وجہ سے ایک ہی خاندان کے پانچ افراد مارے گئے۔

بھارتی فوج کا دعویٰ ہے کہ سن 2003 میں طے پانے والے فائر بندی معاہدے کی پاکستانی فوجیوں کی طرف سے بلا اشتعال خلاف ورزی کے بعد بھارتی فوجی اس کا مناسب جواب دے رہے ہیں۔ ایسوسی ایٹڈ پریس کے مطابق پاکستان کی جانب سے فوری طور پر اس حوالے سے کوئی رد عمل سامنے نہیں آيا تاہم دونوں ہمسایہ ریاستیں اس متنازعہ خطے میں سرحد کے آر پار فائرنگ کی ذمہ داری ایک دوسرے پر عائد کرتی رہتی ہیں۔

کشمیر کا خطہ 1947ء میں تقسیم برصغیر کے بعد سے پاکستان اور بھارت کے درمیان متنازعہ علاقہ ہے۔ دونوں ممالک اس مسئلے پر اب تک دو جنگیں بھی لڑ چکے ہیں۔

دوسری طرف بھارتی زیر انتظام کشمیر میں 1990ء کی دہائی سے کشمیری بھارت سے علیحدگی کے لیے مسلح جدوجہد جاری رکھے ہوئے ہیں۔ اس دوران اب تک 70 ہزار سے زائد کشمیری مارے جا چکے ہیں۔ بھارت پاکستان پر الزام عائد کرتا ہے کہ وہ کشمیریوں کی مسلح جدوجہد میں ان کی مدد کر رہا ہے تاہم پاکستان اس طرح کے الزامات کو رد کرتا ہے۔

حالیہ چند ماہ کے دوران پاکستان اور بھارت کے درمیان لائن آف کنٹرول پر تناؤ میں اضافہ ہوا ہے۔ اسی باعث دونوں جانب اب تک درجنوں فوجی اور عام شہری ہلاک ہو چکے ہیں۔

جرمن خبر رساں ادارے ڈی پی اے کے مطابق بھارتی وزیر دفاع نرملا سیتھا رامن کا دعویٰ ہے کہ رواں برس جنوری میں پاکستانی فوج نے لائن آف کنٹرول پر 209 مرتبہ فائر بندی معاہدے کی خلاف ورزی کی جبکہ فروری کے پہلے نصف حصے میں ایسی خلاف ورزیوں کی تعداد 142 تک پہنچ گئی تھی۔