قبرص سے متعلق ترکی کی یورپی یونین کو دھمکی

انقرہ سے ترکی کی سرکاری خبر ایجنسی اناطولیہ کے حوالے سے موصولہ رپورٹوں کے مطابق یہ دھمکی ترک نائب وزیر اعظم بشیر عطالے نے دی ہے۔ یہ بیان انقرہ حکومت کی طرف سے اگلے سال کی دوسری ششماہی میں یورپی یونین کی صدارت ایک طے شدہ پروگرام کے مطابق چھ ماہ کے لیے قبرص کے حوالے کرنے کے سلسلے میں ترکی کی طرف سے اس آئندہ اقدام کی مخالفت میں دیا جانے والا اب تک کا سب سے سخت بیان ہے، جس کے باعث ترکی کے یورپی یونین کے ساتھ تعلقات اپنی اور بھی نچلی سطح پر آ سکتے ہیں۔

یورپی یونین نے کسی بھی پیشگی وعدے کے بغیر ترکی کی یورپی یونین میں ممکنہ شمولیت سے متعلق انقرہ حکومت کے ساتھ اپنی باضابطہ بات چیت سن 2005 میں شروع کی تھی اور بہت سے یورپی رہنما بار ہا یہ کہہ چکے ہیں کہ اس امر کی کوئی ضمانت نہیں کہ اس مذاکراتی عمل کی تکمیل پر انقرہ کو یونین کی رکنیت دے دی جائے گی۔

ترک حکومت کی طرف سے وزیر اعظم رجب طیب ایردوآن کے نائب بشیر عطالے کی طرف سے دیے گئے اس بیان کا ایک اور اہم پہلو اس کا وقت بھی ہے کیونکہ ترکی اور جمہوریہ قبرص کے درمیان اس وقت ایک نیا تنازعہ بھی پایا جاتا ہے۔ یہ تنازعہ بحیرہ روم کے علاقے میں قبرص کی طرف سے کھلے سمندر کی تہہ میں قدرتی گیس کی تلاش کے اس مجوزہ منصوبے کی وجہ سے پیدا ہوا ہے، جس کے بارے میں انقرہ حکومت یہ کہہ چکی ہے کہ جنوبی قبرصی حکومت کے ایسے منصوبے اشتعال انگیز اور ناقابل قبول ہیں۔

قبرص کے لیے یورپی یونین کی صدارت اور ترکی کے یورپی یونین کے ساتھ رابطوں کے بارے میں ترک نائب وزیر اعظم نے کہا ہے کہ برسلز کے اب تک کے پروگرام کے مطابق قبرص کو یونین کی صدارت چھ ماہ کے لیے اگلے برس یکم جولائی کو منتقل کی جائے گی۔ لیکن اگر تب تک قبرص کے منقسم جزیرے کے شمالی حصے پر مشتمل ترک قبرصی جمہوریہ اور جنوبی حصے پر مشتمل یونانی قبرصی جمہوریہ کے درمیان، جسے صرف قبرص بھی کہا جاتا ہے اور جو یورپی یونین کی رکن ریاست بھی ہے، امن مذاکرات نتیجہ خیز ثابت نہ ہو سکے اور قبرص کو یونین کی صدارت دے دی گئی، تو انقرہ برسلز کے ساتھ اپنے تعلقات کو وہیں پر منجمد کر دے گا۔

ترک نائب وزیر اعظم بشیر عطالے کے بقول ایسی صورت میں انقرہ یونین کے ساتھ اپنے روابط کو بلا تاخیر منجمد کر دے گا اور تب اصلی بحران ترکی اور یورپی یونین کے درمیان پیدا ہو گا۔

قبرص کے جزیرے پر سن 1974 میں ترک فوج کی مداخلت کے بعد سے یہ جزیرہ شمالی حصے کی ترک قبرصی جمہوریہ اور جنوبی حصے کی یونانی قبرصی جمہوریہ میں تقسیم ہے۔ یونانی نسل کی آبادی کی اکثریت والی جمہوریہ  قبرص یورپی یونین کی رکن  اور بین الاقوامی سطح پر ایک تسلیم شدہ ریاست ہے جبکہ ترک نسل کی آبادی کی اکثریت والی شمالی قبرصی جمہوریہ کو ابھی تک بین الاقوامی سطح پر تسلیم نہیں کیا گیا۔ اس تنازعے کے پس منظر میں قبرص میں کئی عشروں سے اقوام متحدہ کا ایک امن مشن بھی کام کر رہا ہے۔

رپورٹ: مقبول ملک

ادارت: شامل شمس