فٹ بال: بائر لیور کوزن کی ٹیم جرمن کپ کے فائنل میں

منگل کو ڈسلڈورف شہر میں پینتیس ہزار شائقین کی موجودگی میں کھیلے جانے والے پہلے سیمی فائنل میچ میں بائر لیور کُوزن کی ٹیم نے اضافی وقت میں تین گول کرتے ہوئے مائنز کی ٹیم کو ایک کے مقابلے میں چار گول سے شکست دے دی۔ اِس طرح سن 1993ء میں یہ کپ جیتنے والی بائر لیور کُوزَن کی ٹیم تیسری مرتبہ اِس کپ کے فائنل تک پہنچنے میں کامیاب ہوئی ہے اور سولہ برسوں کے بعد ایک بار پھر جرمن کپ حاصل کرنے کی اُمید کر رہی ہے۔

اِس سے پہلے لیورکوزن کے کھلاڑی آنگیلوس ہارِسٹیاس نے بیاسی ویں منٹ میں گول کر کے اپنی ٹیم کو ایک صفر کی برتری دلا دی تھی لیکن مائنز کے کھلاڑی ارسٹیڈ بانکے نے چند ہی منٹ بعد گیند کو سر سے گول میں پھینک کر مقابلہ ایک ایک گول سے برابر کر دیا۔ تاہم اضافی وقت میں لیورکوزن کے کھلاڑیوں وِدال، رولفیس اور کاڈلیچ نے گول کر کے اپنی ٹیم کو فائنل تک پہنچا دیا۔

فائنل میچ تیس مئی کو جرمن دارالحکومت برلن میں کھیلا جائے گا، جہاں بائر لیور کُوزن کا مقابلہ ہیمبرگ ایس وی یا پھر ویردر بریمن کی ٹیم کے ساتھ ہو گا۔ ان دونوں ٹیموں کے درمیان سیمی فائنل بدھ کی شام کو ہیمبرگ میں کھیلا جانے والا ہے۔