شمالی بھارت میں طوفانِ باد و باراں، درجنوں افراد ہلاک

بھارت میں بدھ دو اپریل کی شام سے چلنے والے زوردار طوفان کی زد میں آ کر ہلاک ہونے والوں کی تعداد درجنوں میں ہے جبکہ سینکڑوں افراد زخمی بھی ہوئے ہیں۔ انتظامی حکام نے نیوز ایجنسی اے ایف پی کو بتایا کہ اتر پردیش ریاست کے 75 میں سے چالیس اضلاع متاثر ہوئے ہیں۔ ان میں کم از کم 65 افراد کے ہلاک ہونے کی تصدیق کر دی گئی ہے۔ بقیہ ہلاکتیں دوسرے علاقوں میں ہوئی ہیں۔

طاقت ور طوفان سے تاج محل کے دروازوں کے دو مینار الٹ گئے

بھارتی زیر انتظام کشمیر میں برفانی تودہ گرنے سے 11 ہلاک

سمندری طوفان کے سبب بھارت اور سری لنکا میں 26 ہلاکتیںقدرتی آفات سے متعلق نئی رپورٹ: جنوبی ایشیا کے شہر خطرے میں

 

اتر پردیش ریاست کے ریلیف کمیشنر ٹی پی گپتا کے مطابق ہلاکتوں کے ساتھ ساتھ ہونے والی دوسری تباہی کا بھی اندازہ لگایا جا رہا ہے اور اس وقت ترجیحی بنیادوں پر زخمیوں کو علاج معالجے کی سہولیات فراہم کی جا رہی ہیں۔

اُدھر راجستھان کے آفتوں سے نمٹنے والے ادارے کے مطابق ریاست میں ہونے والی ہلاکتیں تینتیس ہیں راجستھان کو بھی انتہائی تیز رفتار جھکڑوں کا سامنا رہا۔ اس طوفان کے ساتھ چلنے والی ہوا کی رفتار ایک سو کلومیٹر سے زائد تھی۔ مقامی ضلعی حکام کے مطابق ابھی امدادی عمل جاری ہے اور ہلاکتوں میں اضافے کا قوی امکان ہے۔

 انتظامی اہلکاروں کے مطابق بیشتر ہلاکتوں کی وجہ طوفان کے دوران مختلف مکانات اور عمارتوں پر گرنے والی آسمانی بجلی ہے۔ اس بجلی کے گرنے سے کئی عمارتوں کو انہدام کا سامنا کرنا پڑا۔ کئی ہلاکتوں کی وجہ درختوں کا گرنا بھی بتایا گیا ہے۔ حکام کے مطابق اس قدرتی آفت کے باعث کئی علاقوں میں بجلی کا نظام بھی درہم برہم ہو کر رہ گیا ہے۔ تین سو کے قریب بجلی کے کھمبے بھی گر چکے ہیں۔

اتر پردیش کے متاثرہ چالیس اضلاع میں سے سب سے زیادہ جانی و مالی نقصان کا سامنا آگرہ شہر کو رہا، جہاں تینتالیس افراد ہلاک ہوئے۔ آگرہ ہی وہ شہر ہے، جس میں مغلیہ دور حکومت کے بادشاہ شہنشاہ جہانگیر کے عہد میں تعمیر کیا جانے والا عالمی شہرت کا حامل تاج محل واقع ہے۔

اس دوران اتر پردیش کے وزیر اعلیٰ یوگی ادیتہ ناتھ نے امدادی اداروں کے اہلکاروں کو متاثرین کی ہر ممکن امداد فراہم کرنے کا حکم جاری کیا ہے۔ وزیر اعلیٰ سارے ریلیف کام کی ذاتی طور پر نگرانی کر رہے ہیں۔ یہ بھی اعلان کیا گیا کہ ہر ہلاک ہونے والے افراد کے لواحقین کو چار چار لاکھ بھارتی روپے زر تلافی کے طور پر دیے جائیں گے۔

 ع ح ⁄ ع ب ⁄  اے ایف پی