سیف علی خان کے بیٹے تیمور کا نام اور سوشل میڈیا کی نئی بحث

بالی وڈ کے اداکار سیف علی خان نے حال ہی میں ریلیز ہونے والی اپنی ایک فلم 'تنہا جی' سے متعلق ایک انٹرویو میں بعض ایسی باتیں کہہ دیں کہ انھیں سوشل میڈیا پر ٹرول کیا جا رہا ہے۔ فلم 'تنہا جی' (ان سنگ واریئر) ایک مراٹھی فوجی لیڈر پر مبنی ہے۔ 

انٹرویو کے دوران جب فلم میں جو سیاسی اور تاریخی منظر کے تناظر میں سوال کیا گیا تو انہوں نے کہا، "میں نہیں سمجھتا کہ یہ تاریخ  ہے۔ تاریخ کے بارے میں مجھے اچھی طرح سے معلوم ہے۔ میرے خیال سے شاید  انڈيا کا تصور ہی اس وقت تک نہیں تھا، جب تک برطانیہ نے یہ تصور نہیں دیا۔"

اسی بات پر بحث شروع ہوگئی اور ٹویٹر پر لوگوں نے انھیں ٹرول کرنا شروع کر دیا۔ ایک شخص نے ہندوستان کا قدیم نقشہ شیئر کرتے ہوئے لکھا کہ، :جناب کچھ لکھنے سے پہلے تاریخ کا مطالعہ کر لیا کریں۔"  ایک دوسری صارف نے لکھا ہاں انڈيا کا تصور نہیں تھا اسی لیے تو "پشتینی امریکیوں کو ریڈ پاکستانی کہا جاتا ہے۔"

حکمراں جماعت بی جے پی کی ترجمان میناکشی لیکھی بھی اس بحث میں شامل ہو کر سیف علی خان کے سب سے چھوٹے بیٹے تیمور علی خان کے نام کا ذکر کرتے ہوئے بحث کا رخ ہی بدل دیا۔ انھوں نے ایک ٹویٹ میں لکھا، " ترک بھی تیمور کو ظالم سمجھتے ہیں! لیکن پھر بھی کچھ لوگوں نے اپنے بیٹے کا نام تیمور رکھنا پسند کیا۔" ایک شخص نے ایک پرانی پینٹنگ شیئر کی جس میں تیمور کے پیچھے لاشوں کا ڈھیر دکھایا گيا ہے۔

اداکار سیف علی خان کی اہلیہ کرینہ سے ان کے سب سے چھوٹے بیٹے کی پیدائش سن 2016 میں ہوئی تھی اور اس کا نام تیمورعلی خان رکھا۔ تیمور کے بھارت پر حملے کے تناظر میں انتہا پسند حامل ہندو رہنما سیف علی خان اور کرینہ کو تنقید کا نشانہ بناتے رہے ہیں۔

اداکار سیف علی خان اس تنقید کو بے بنیاد قرار دیا۔ سنہ 2017 میں اس سے متعلق ایک تفصیلی انٹرویو میں انھوں نے کہا تھا کہ اُن کے بیٹے کا نام تیمور بادشاہ کے نام پر نہیں۔ ان کا کہنا تھا، "میں اور میری اہلیہ دونوں ہی کو اس  لفظ کی آواز اور معنی سے پیار ہے۔ یہ ایک قدیم فارسی نام ہے جس کا مطلب آہن ہوتا ہے۔" آہن کے معنی فولاد یا لوہا ہے۔

ایک موقع پر سیف علی حان نے یہ بات بھی تسلیم کی تھی کہ ان کے بیٹے تیمور کے نام پر نکتہ چینی کے تناظر میں ابتدائی دنوں میں بیٹے کے نام کو تبدیل کرنے پر بھی غور کر چکے ہیں۔