سندھ میں سکیورٹی فورسز کی کارروائی، دو شدت پسند ہلاک

اطلاعات کے مطابق سکیورٹی فورسز نے یہ کارروائی ہفتے کو  صبح سویرے سکھر کے علاقے پٹنی میں کی۔ حکام کے مطابق ہلاک ہونے والے دونوں افراد پر سکیورٹی فورسز کے خلاف حملوں کا الزام تھا۔

انسداد دہشت گردی کی پولیس کے اہلکار شاہد سولنگی نے امریکی نیوز ایجنسی ایسوسی ایٹڈ پریس کو بتایا کہ سکیورٹی آپریشن کے دوران ملزمان نے فرار ہونے کی کوشش کی اور  پولیس پر فائرنگ شروع کردی۔ اہلکار کے مطابق پولیس کی جوابی فائرنگ میں دونوں شدت پسند مارے گئے۔

یہ بھی پڑھیے: خواتین شدت پسندوں کا ٹارگٹ کیوں بنیں؟

ہلاک ہونے والے دونوں افراد کا تعلق پاکستانی طالبان سے منسلک  نور اسلام گروپ سے بتایا گیا ہے۔

حکام کا کہنا ہے کہ یہ دونوں افراد جنوبی وزیرستان اور خیبر پختونخواہ کے دیگر علاقوں میں پولیس اور سکیورٹی فورسز پر حملوں میں ملوث تھے۔

سولنگی کے مطابق دونوں افراد پر سکیورٹی فورسز کی نظر میں تھے اور کچھ روز پہلے ہی صوبہ سندھ میں داخل ہوئے تھے۔

پرتشدد واقعات میں اضافہ

رواں ہفتے کے آغاز میں بائیس فروری کو پاکستان کے سابقہ قبائلی علاقے میں ایک امدادی تنظیم کی گاڑی پر نامعلوم افراد کی فائرنگ کے نتیجے میں چار خواتین ہلاک ہو گئی تھیں۔ یہ خواتین ایک غير سرکاری تنظيم کے لیے کام کرتی تھیں۔

مزید پڑھیے: ایف اے ٹی ایف کا فیصلہ: ماہرین اور حکومت کو مایوسی

اس کے علاوہ حالیہ چند مہینوں کے دوران پاکستان میں عسکریت پسندوں کی جانب سے خاص طور پر سکیورٹی فورسز پر حملوں میں بھی تیزی دیکھی گئی ہے۔ ان میں زیادہ تر واقعات سابقہ قبائلی علاقوں اور بلوچستان میں پیش آئے ہیں۔

پاکستانی فوج کے ترجمان جنرل بابر افتخار نے رواں ہفتے ایک پریس کانفرس کہا تھا  کہ فوج کی جانب سے دہشت گردوں کے ٹھکانوں پر حملوں کے ردعمل میں پرتشدد کارروائیوں میں اضافہ دیکھا جا رہا ہے۔

ع آ / ش ج (اے پی)