سری لنکا میں سیاسی تبدیلی، مہندا پاکشے مستعفی ہو گئے

سری لنکا کے سیاسی بحران میں اب ایک نئی صورت سامنے آئی ہے اور یہ مہندا راجا پاکشے کا منصب وزارت عظمیٰ سے استعفیٰ دینا ہے۔ اس منصب پر مہندا راجا پاکشے سات ہفتوں تک براجمان رہے اور اس دوران وہ ملکی پارلیمنٹ سے اعتماد کا ووٹ حاصل کرنے میں ناکام رہے تھے۔

مقامی سیاسی تجزیہ کاروں نے اس امکان کو ظاہر کیا ہے کہ سری لنکن صدر میتھری پالا سری سینا راجا پاکشے کے مستعفی ہونے کے بعد ایک مرتبہ پھر رانیل وکرمے سنگھے کو وزیر اعظم نامزد کر سکتے ہیں۔ سری لنکن صدر اپنی سیاسی ہزیمتوں کے تناظر میں سخت الفاظ میں واضح کر چکے ہیں کہ وہ کسی بھی صورت سابق وزیراعظم کو نامزد نہیں کریں گے۔

رواں برس وسط نومبر میں سری لنکن سپریم کورٹ کے ایک مختصر حکم پر بحال کی گئی ملکی پارلیمنٹ نے نئے وزیراعظم مہندا راجا پاکشے کے خلاف تحریک عدم اعتماد منظور کی تھی۔ اس ناکامی کو صدر سری سینا کے لیے ایک بڑی شکست قرار دیا گیا تھا۔ اُسی وقت سے کہا جا رہا تھا کہ پارلیمان میں منظور ہونے والی اس تحریک کے بعد راجا پاکشے کو اپنے منصب سے یقینی طور پر مستعفی ہونا پڑے گا۔

اس دوران چند روز قبل رانیل وکرمے سنگھے پر پارلیمنٹ نے اعتماد کا اظہار کیا تھا۔ امکاناً اسی اعتماد کے اظہار پر مہندا راجا پاکشے نے استعفیٰ دینے کا فیصلہ کیا کیونکہ انہیں یہ محسوس ہو گیا تھا کہ وہ کسی بھی صورت میں منصب وزارت عظمیٰ کے تسلسل کے لیے پارلیمنٹ کا اعتماد حاصل نہیں کر سکیں گے۔

وکرمے سنگھے کو صدر سری سینا نے رواں برس اکتوبر میں برخاست کر دیا تھا اور ان کی جگہ چھبیس اکتوبر کو سابق صدر راجا پاکشے کو وزیراعظم نامزد کیا تھا۔ اس دوران انہوں نے پارلیمنٹ کو تحلیل بھی کیا لیکن اُسے ملکی سپریم کورٹ نے بحال کر دیا تھا۔ راجا پاکشے سن 2005 سے 2015 تک صدر بھی رہے تھے۔