خلیجی ممالک میں فرقہ ورانہ فسادات کے خطرات

لبنان میں اغوا کی واردات کے بعد سنی خلیجی ممالک نے لبنان میں مقیم اپنے باشندوں کو ملک چھوڑنے کے احکامات جاری کر دیے ہیں۔ اس طرح شام کا تنازعہ مشرق وسطیٰ سمیت دیگر خلیجی ممالک پر بھی اثر انداز ہوتا دکھائی دے رہا ہے۔

لبنان میں شیعہ تنظیم حزب اللہ کے عسکریت پسندوں کے زیر نگرانی علاقے سے اغوا ہونے والوں میں ایک ترک، ایک سعودی اور متعدد شامی باشندے شامل ہیں۔ اس واقعے کے رونما ہونے کے بعد سے خطے میں فرقہ ورانہ فسادات کی آگ پھیلنے کے خدشات بڑھ گئے ہیں۔ اس مسئلے کو خاص طور سے لبنان کی تاریخ کے تناظر میں دیکھا جا رہا ہے جہاں ماضی میں فرقہ ورانہ بنیاد پر 15 سال تک خانہ جنگی رہی ہے۔

دریں اثناء سعودی عرب، متحدہ عرب امارات اور قطر نے اپنے اپنے شہریوں کو لبنان سے نکل جانے کے لیے کہہ دیا ہے۔ کچھ ممالک نے طیاروں کے ذریعے اپنے شہریوں کو لبنان سے نکالنے کا سلسلہ شروع بھی کر دیا ہے۔ لبنانی قبیلے المقداد میں شامل اراکین دراصل ایک طاقت ور شیعہ فیملی سے تعلق رکھتے ہیں۔ اس قبیلے کی طرف سے 20 افراد کے اغوا کے ساتھ ساتھ شامی صدر بشار الاسد کے خلاف جاری بغاوت کا ساتھ دینے والوں کو بھی اغوا کرنے کی دھمکی دی گئی ہے۔ اغوا کنندگان کا کہنا ہے کہ دو روز قبل دمشق میں فری سیریئن آرمی کے باغیوں نے ان کے ایک رشتہ دار حسن المقداد کو اغوا کر لیا تھا جس کے جواب میں انہوں نے لبنان میں 20 افراد کو اغوا کر لیا ہے۔ باغیوں کا کہنا ہے کہ حسن المقداد نامی یہ شخص حکومتی افواج کا ساتھ دے رہا تھا اور وہ لبنانی تنظیم حزب اللہ کا رکن ہے لیکن حزب اللہ نے اس الزام کو رد کر دیا ہے۔

المقداد کے بھائی حاتم نے سنی مسلمانوں کی اکثریت والے ممالک قطر، سعودی عرب اور ترکی کے باشندوں کو دھمکی دی ہے۔ ان تمام ملکوں کی طرف سے بشار الاسد کے مخالفین اور شامی باغیوں کو بھرپور حمایت حاصل ہے۔

دریں اثناء ایئر فرانس نے سکیورٹی وجوہات کی بناء پر بیروت جانے والی اپنی ایک پرواز کا رخ بدل دیا ہے۔ شام میں یرغمال بنائے جانے والے لبنانی باشندوں کے گھر والے بیروت کے ایئرپورٹ کو جانے والی سڑک پر مسلسل رکاوٹیں کھڑی کرتے رہے ہیں۔

ادھر لبنانی وزیر اعظم نجیب مکاتی نے اغوا کے واقعے کو ناقابل قبول عمل قرار دیا ہے۔ انہوں نے ایک بیان میں کہا کہ شام میں لبنانی باشندے کے اغوا کے جواب میں لبنان میں اغوا کے واقعات سے کچھ حاصل نہیں ہو گا بلکہ ماضی کی وہ تکلیف دہ یادیں واپس آ جائیں گی، جب لبنان میں فرقہ واریت نے ایک طویل خانہ جنگی کی شکل اختیار کر لی تھی۔ دریں اثناء لبنان کے ایک سُنی مفتی مالک شار نے بدھ کی شب سلامتی کی تشویش ناک صورتحال کے حوالے سے ایک ہنگامی اجلاس طلب کر لیا تھا۔

km/aa (Reuters)