’نائیک‘ صحت یاب ہو رہا ہے مگر خطرہ برقرار

ریاست کوئنز لینڈ میں جانوروں کے ایک ہسپتال کے ڈاکٹروں نے بتایا ہے کہ نائیک نامی اس اژدھے کے جسم سے چپکی تمام پانچ سو گیارہ جوؤں کو نکال لیا گیا ہے۔ اس موقع پر کرمبین وائلڈ لائف ہسپتال کی جانب سے زیر علاج نائیک کے لیے نیک خواہشات کا اظہار کرنے والے تمام افراد کا شکریہ بھی ادا کیا گیا ہے۔

ڈاکٹروں کے مطابق خون چوسنے والے ان کیڑوں کو جلد سے ہٹانے کے عمل میں کئی گھنٹے لگے اور اب اس اژدھے کی حالت تیزی سے بہتر ہو رہی ہے۔ نائیک کی نئی تصویر بھی جاری کی گئی ہے۔

کرمبین وائلڈ لائف ہسپتال نے بتایا کہ جوؤں کی وجہ سے نائیک انیمیا یعنی خون کی کمی کا شکار تھا، ’’نائیک کو شدید قسم کی انفیشکن بھی ہو گیا تھا، جس کی وجہ سے وہ مناسب انداز میں حرکت نہیں کر پا رہا تھا اور اس طرح جوؤں کو فائدہ اٹھانے کا موقع مل گیا۔‘‘

اس بیان میں مزید بتایا گیا، ’’نائیک کو ابھی بھی پیچیدگیوں اور طبی مسائل کا سامنا ہے مگر ہم پر امید ہیں کہ وہ جلد مکمل طور پر صحتیاب ہو جائے گا۔ اس کے بعد آئندہ مہینوں کے دوران اسے دوبارہ سے جنگل میں چھوڑ دیا جائے گا۔‘‘

نائیک کو گزشتہ ہفتے پکڑا گیا تھا۔ ماہرین کے مطابق نائیک کی کوشش تھی کہ وہ کسی نہ کسی طرح خون چوسنے والے ان حشرات سے جان چھڑائے اور اسی وجہ سے وہ سوئمنگ پول میں موجود تھا اور باہر آنا نہیں چاہ رہا تھا۔