جرمنی کا ’گرین کارڈ‘ متعارف کرانے کا منصوبہ

جرمنی کی طرف سے گرین کارڈ کی طرز پر جو کارڈ متعارف کرایا جا رہا ہے اسے 'چانسن کارٹے‘ کا نام دیا گیا ہے جس کا مطلب ہے کہ مواقع فراہم کرنے والا کارڈ۔ اس کا مقصد جرمنی کو درپیش ہنرمند کارکنوں کی شدید قلت پر قابو پانا ہے۔ جرمنی کی صنعتی ایسویسی ایشنز کافی عرصے سے ورک فورس کی کمی کی شکایت کر رہی ہیں، جبکہ جرمن لیبر منسٹری کا بھی یہی کہنا ہے کہ اس کمی کی وجہ سے ملکی معاشی ترقی متاثر ہو رہی ہے۔

جرمن لیبر منسٹر ہوبیرٹَس ہائیل کی طرف رواں ہفتے میڈیا کے سامنے نیا 'اوپورچونٹی  کارڈ‘ متعارف کرایا گیا جس کے ذریعے غیر ملکی افراد کو ملازمت کی پیشکش کے بغیر بھی جرمنی آ کر ملازمت تلاش کرنے کے مواقع مل سکیں گے۔ تاہم اس کے لیے انہیں ان چار میں سے کم از کم تین شرائط پر پورا اترنا ہو گا۔

1۔ یونیورسٹی ڈگری یا پیشہ ورانہ تربیت

2۔ کم از کم تین برس کے پیشہ ورانہ کام کا تجربہ

3۔ جرمنی زبان کی مہارت یا قبل ازیں جرمنی میں رہائش

4۔ 35 برس سے کم عمر

جرمن لیبر منسٹر کی طرف سے میڈیا کو بتایا گیا کہ ملکی حکومت سال بہ سال، روزگار کی منڈی میں طلب کی بنیاد پر ایسے کارڈز کی تعداد جاری کرنے کا فیصلہ کرے گی۔

ہوبیرٹَس ہائیل نے جرمن سرکاری ریڈیو اسٹیشن ڈبلیو ڈی آر سے گفتگو کرتے ہوئے کہا، ''یہ کوالیفائیڈ امیگریشن سے متعلق ہے، جس کے لیے یہ نسبتاﹰ آسان طریقہ ہے اور یہی وجہ ہے کہ یہ بات کہنا اہم ہے کہ ان لوگوں کے لیے جن کے پاس اوپورچونٹی  کارڈ ہے وہ یہاں جرمنی میں موجودگی کے دوران کچھ کما سکتے ہیں۔‘‘

جرمنی میں تربیت یافتہ افراد کی شدید کمی

جرمنی میں تربیت یافتہ لیبر کی کمی کافی وقت سے ایک مسئلہ بنی ہوئی ہے۔ جرمنی کی دھات اور الیکٹریکل انجینیئرنگ سے متعلق صنعتوں کے آجرین کی فیڈریشن 'گیزامٹ میٹال‘ کا کہنا ہے کہ ان شعبوں کی ہر پانچ میں سے دو کمپنیوں کو اسٹاف کی کمی کے باعث پرڈوکشن میں رکاوٹ کا سامنا ہے۔ تربیت یافتہ شعبوں کی مرکزی ایسوسی ایشن (زیڈ ڈی ایچ) کا کہنا ہے کہ جرمنی کو اس وقت قریب ڈھائی لاکھ تربیت یافتہ ورکرز کی کمی کا سامنا ہے۔

غیر یورپی ممالک سے تربیت یافتہ تارکین وطن کی جرمنی آمد کا سلسلہ گزشتہ کچھ برسوں کے دوران بہتر ہوا ہے، لیکن یہ پھر بھی نسبتاﹰ کم ہے۔ جرمن میں انضمام سے متعلق ادارے 'میڈیئن ڈینسٹ انٹیگریشن‘ کے مطابق ایسے ممالک سے آنے والے  تربیت یافتہ ورکرز کی تعداد سال 2019ء کے دوران صرف 60 ہزار کے قریب تھی اور یہ اسی سال کے دوران یورپی یونین کے باہر سے آنے والے کُل تارکین وطن کا محض 12 فیصد سے کچھ زیادہ تھی۔

بینجمن نائٹ (ا ب ا/ک م)