بھارت:کورونا سے متاثرین کی تعداد 20 لاکھ کے قریب
6 اگست 2020
بھارتی وزارت صحت کی طرف سے جاری اعداد و شمار کے مطابق پچھلے 24 گھنٹوں میں 56 ہزار 282 نئے کیسز سامنے آئے، جس کے ساتھ ملک میں کورونا سے متاثرین کی تعداد 19لاکھ 67 ہزار 838 ہوگئی ہے جبکہ 904 مزید اموات کے ساتھ مرنے والوں کی تعداد 40 ہزار 778 ہوچکی ہے۔
بھارت، امریکا اور برازیل کے بعد کورونا وائرس سے سب سے زیادہ متاثرہ تیسرا ملک ہے۔ تاہم بھارت میں ہر روز نئے کیسز کی تعداد میں جس قدر تیزی سے اضافہ ہورہا ہے اس کے مدنظر یہ خدشہ ظاہر کیا جارہا ہے کہ یہ جلد ہی برازیل کو بھی پیچھے چھوڑ سکتا ہے۔
جمعرات کو مسلسل آٹھواں دن تھا جب 50000 سے زائد نئے کیسز سامنے آئے۔ حکومت کا تاہم دعوی ہے کہ کورونا سے متاثرہ مریضوں کے صحت یاب ہونے کی شرح میں بھی مسلسل اضافہ ہورہا ہے۔ یہ 67.19 فیصد پہنچ گئی ہے اور مجموعی طور پر13 لاکھ 29 ہزار 202 مریض صحت یاب ہوئے ہیں۔
کووڈ ہسپتال میں آگ
وزیر اعظم نریندر مودی کی آبائی ریاست گجرات کے احمد آباد میں جمعرات چھ اگست کی صبح کووڈ کے ایک ہسپتال میں آگ لگ جانے سے تین خواتین سمیت آٹھ مریض ہلاک ہوگئے۔ آگ ہسپتال کی چوتھی منزل پر آئی سی یو میں لگی تھی۔
فائربریگیڈ کے ذرائع کا کہنا ہے کہ آگ آئی سی یو میں لگی اور دھیرے دھیرے پھیلتی چلی گئی۔ 50 بستروں والے اس ہسپتال میں حادثے کے وقت تقریباً 45 مریض زیر علاج تھے۔
وزیر اعظم مودی نے اس حادثے پر ریاستی وزیر اعلی وجے روپانی اور احمد آباد کے میئر بجل پٹیل سے بات کی اور وزیر اعظم راحت فنڈ سے معاوضے کا اعلان کیا۔ مسٹر مودی نے ایک ٹوئٹ میں لکھا”احمدآباد کے ہسپتال میں آگ لگنے کے حادثے پر افسوس ہوا۔ متاثرین کے رشتہ داروں کے تئیں اظہار ہمدردی۔ اس حادثے میں زخمی افراد جلد صحت یاب ہوں۔ میں نے صورت حال کے سلسلے میں وزیر اعلی وجے روپانی اور میئر سے بات چیت کی ہے۔ انتظامیہ متاثرین کو ہر ممکن مدد کررہی ہے۔"
خیال رہے کہ گجرات میں کورونا وائرس کے اب تک 66 ہزار سے زائد کیسزدرج کیے جاچکے ہیں۔ یہ ملک کے سب سے زیادہ متاثرہ دس ریاستوں میں سے ایک ہے۔ گجرات میں اس وبا کی وجہ سے اب تک ڈھائی ہزارسے زیادہ افراد ہلاک ہوچکے ہیں۔
اب پٹرولیم کے وزیر بھی کورونا سے متاثر
بھارت میں وزیر داخلہ امیت شاہ کے بعد اب پٹرولیم اور قدرتی گیس کے وفاقی وزیر دھرمیندر پردھان بھی کورونا پازیٹیو پائے گئے ہیں جس کے بعد انہیں بھی ہسپتال میں داخل کرا دیا گیا ہے۔
ان دونوں مرکزی رہنماوں کے علاوہ بھی حکمراں بی جے پی کے متعدد رہنما کورونا سے متاثر ہیں۔ ان میں کرناٹک کے وزیر اعلی بی ایس یدیورپا، ریاست اترپردیش کے پانچ وزراء اور کرناٹک کے کئی وزراء، اترپردیش ریاستی بی جے پی کے صدر، گجرات میں بی جے پی کے نائب صدر، بہار میں بی جے پی کے ریاستی جنرل سکریٹری، نائب صدر اور تنظیمی سکریٹری سمیت درجنوں رہنما کورونا پازیٹیو پائے گئے ہیں۔ تمل ناڈو کے گورنر بنواری لال پروہت بھی کووڈ پازیٹیو پائے گئے ہیں۔ جبکہ اترپردیش کی واحد خاتون وزیرکمل رانی ورون کورونا کی وجہ سے چل بسیں۔
کانگریس کے رکن پارلیمان کارتی چدمبرم بھی کورونا پازیٹیو پائے گئے ہیں جبکہ ترنمول کانگریس کے ایک رکن اسمبلی کی کورونا سے موت ہوگئی۔