برفانی تودہ گرنے سے تین جرمن سیاح ہلاک، ایک لاپتہ

اسکیینگ کے دوران برفانی تودے تلے دب کر ہلاک ہونے والے جرمن سیاحوں کی عمریں ستاون، چھتیس اور بتیس برس بتائی گئی ہیں۔ ان تینوں سیاحوں کی نعشیں اسکیینگ کے مشہور پہاڑی گاؤں لیخ کے قریب سے برف تلے دبی ملی تھیں۔ یہ چاروں افراد اسکیینگ کے مرکز سے بھی زیادہ دور نہیں تھے کہ برفانی تودے کی زد میں آ گئے تھے۔

ان کا چوتھا ساتھی لاپتہ بتایا گیا ہے۔ اس لاپتہ شخص کی عمر اٹھائیس برس ہے۔ اندھیرا چھا جانے کی وجہ سے تلاش کا عمل عارضی طور پر موقوف کر دیا گیا تھا۔ امکان ظاہر کیا گیا ہے کہ لاپتہ شخص کے بچنے کا امکان کم ہے کیونکہ وہ بھی برف میں دبنے کے بعد آگے چلا گیا ہے۔ اسکیینگ کے شوقین سیاحوں کو ویک اینڈ پر شدید برفباری کا سامنا تھا۔ اس باعث اتوار کو بھی تلاش کا سلسلہ جاری نہیں رکھا جا سکا تھا۔

ان لاپتہ افراد کی تلاش کا سلسلہ اُس وقت شروع کیا گیا، جب ایک مرنے والے کی اہلیہ نے پولیس کو اپنے شوہر کے لاپتہ یا رابطہ نہ کرنے کی رپورٹ درج کرائی۔ یہ حادثہ ہفتہ بارہ جنوری کو دن میں پیش آیا لیکن نعشیں مقامی وقت کے مطابق رات گیارہ بجے کے قریب ریسکیو ٹیم نے ڈھونڈ نکالی تھیں۔ لیخ کا اسکیینگ سیاحتی مقام آسٹریا کی انتہائی مغربی ریاست فورالبیرگ میں واقع ہے۔

پولیس کے مطابق ان چاروں کے پاس تمام حفاظتی سامان بھی موجود تھا لیکن برفانی تودے کے گرنے کے بعد اُن کے پہنے ہوئے لائف سیونگ ایئر لیگ کھل نہیں سکے تھے۔ مقامی حکام کی ہدایت پر پیر چودہ جنوری کو چوتھے لاپتہ شخص کی تلاش شروع کی جائے گی۔ ان تین ہلاکتوں کے بعد یورپ میں شدید برفباری سے ہونے والی ہلاکتوں کی تعداد جوبیس تک پہنچ گئی ہے۔