ایران میں مقید یونانی صحافی کی رہائی کا امکان

ایران کے سرکاری ٹیلی ویژن نے ملک کے متنازعہ صدارتی الیکشن کے بعد حکومت کی جانب سے مزید گرفتاریوں کو رپورٹ کیا ہے۔ رپورٹ میں بتایا گیا کہ ایرانی عوام کو بھڑکانے اور مظاہروں کی ترغیب دینے کے سلسلے میں سکیورٹی اہلکاروں نے شمال مغربی شہر قزوین سے سات افراد کو حراست میں لیا ہے۔

جبکہ نیم سرکاری خبر رساں ایجنسی فارس کے مطابق بارہ جون کے صدارتی الیکشن کے بعد شروع ہونے والے ہنگاموں کے دوران حکومتی کارروائی سے متاثر ہونے والے افراد کے خاندانوں کو خصوصی معاوضہ دیئے جانے کی خبر دی ہے۔ مظاہروں کے دوران متاثر ہونے والے افراد کو حکومت نے معصوم شہریوں سے تعبیر کیا ہے۔

اِسی طرح تہران میں گزشتہ ماہ ایک یونانی صحافی کی گرفتاری کے حوالے سے یونان کے دارالحکومت ایتھنز متعین ایرانی سفیر مہدی ہُنر دوست کا کہنا ہے کہ صحافی کو جلد رہا کردیا جائے گا۔ یونانی صحافی Lason Athanasiads امریکی اخبار واشنگٹن ٹائمز کے نمائندے ہیں۔ ایرانی سفیر نے یہ یقین دہانی یونان کی ایک چھوٹی دائیں بازُو کی جماعت کے سربراہ Giogros Karadzaferis کو گزشتہ روز کرائی تھی۔

دوسری جانب یورپی یونین نے برطانوی سفارت خانے کے مقامی ملازمین کی گرفتاری کے حوالے سے تہران میں تعینات یونین کے سفیروں کی واپس طلبی کے حوالے سے کہا ہے کہ یونین اِس سلسلے میں ایکشن لینے کے لئے تیار ہے۔ اِس مناسبت سے یونین نے برطانوی تجویز پر غوروخوص کیا اور ایرانی حکومت سے جلد ردِ عمل کی توقع کا اظہار کیا گیا ہے۔ برطانوی سفارت خانے میں کام کرنے والے نو مقامی ملازمین میں سے آٹھ کی رہائی کی اطلاع سامنے آ چکی ہے۔ برطانوی تجویز کے حوالے سے یہ بھی سامنے آیا ہے کہ کچھ یورپی ملکوں کی حکومتیں سفیروں کو واپس بلانے پر تیار نہیں اور وہ ایران کے ساتھ اپنے اپنےسفارتی تعلُقات کو منجمد کرنے کو بھی فی الحال درست قدم خیال نہیں کر رہے۔

یورپی یونین میں یہ بات بھی گردش کر رہی ہے کہ سفارت کاروں کو بطور احتجاج کچھ دِنوں کے لئے بھی لایا جا سکتا ہے۔ اِس سلسلے میں یورپی یونین کے موجودہ ششماہی کے صدر ملک سویڈن کے وزیر اعظم Fredrik Reinfeldt نے بھی یورپی ملکوں کو ایرانی صورت حال پر دانائی کے ساتھ عمل کرنے کی تلقین کی ہے۔

متنازعہ صدارتی الیکشن کے بعد کی اندرون ایران پیدا شدہ صورت حال کے ساتھ جوہری معاملات کے حوالے سے بات چیت کس رُخ جاتی ہے، اِس کا تعین امکاناً اِس ماہ میں اٹلی میں امیر ملکوں کے گروپ آٹھ کی سربراہ کانفرنس میں حتمی پالیسی یا فیصلوں کے بعد ہی ہو گا۔

ایرانی سیاسی منظر نامے پر ایک اور پیش رفت یہ ہے کہ ایران کی نوبل انعام یافتہ خاتون شیرین عبادی نے اقوام متحدہ کے سیکریٹری جنرل بان کی مون سے مطالبہ کیا ہے کہ وہ ایران میں الیکشن کے بعد کی صورت حال کی چھان بین کے حوالے سے اپنا خصوصی نمائندہ مقرر کریں۔ اِس ضمن میں ایران کی انسانی حقوق کی تنظیموں کی جانب سے بان کی مون کو ایک خط بھی روانہ کیا گیا ہے جو اُن کے دفتر کو موصول ہو گیا ہے۔