اچھی ذہنی صحت کا راز

عام طور پر یہی کہا جاتا ہے کہ آٹھ گھنٹے کی نیند پوری کرنے کے بے شمار طبی فوائد ہیں لیکن گھنٹوں سے زیادہ یہ اہم اچھی اور گہری نیند ہے۔ بھر پور نیند کے چند گھنٹے بھی دماغی صحت کے لیے مفید ثابت ہوتے ہیں۔

اس سائنسی تحقیق پر سائنس الرٹ نامی ویب سائٹ پر شائع ہونے والے ایک متن میں بتایا گیا ہے کہ نیند کی کمی ڈپریشن اور موڈ کی خرابی کا باعث بن سکتی ہے۔ نیند کی کمی کے باعث دن کے اوقات میں چڑچڑا پن ہونا عام بات ہے جو نہ صرف آپ کے کاموں کو متاثر کرتا ہے بلکہ رشتوں کو بھی۔

لیکن صرف اچھی نیند کافی نہیں ہے۔متوازن غذا بھی ہمیں ڈپریشن سے دور رکھتی ہے۔ دالیں، سبزیوں اور پھلوں میں ایسے وٹامنز اور معدنیات ہوتے ہیں جو ہماری اچھی دماغی صحت کے لیے ضروری ہے۔

اس رسرچ پیپر میں یہ بھی لکھا گیا ہے کہ اگر لوگ یہ سمجھ جائیں کہ انہیں غذا، نیند اور ورزش تینوں عناصر کا خیال رکھنا ہے تو یہ ان کی دیر پا صحت کے لیے مفید ہو سکتا ہے۔

سونے سے تقریباﹰ ایک گھنٹا قبل ٹیبلٹس، ٹی وی اور موبائل فون کا استعمال ترک کر دینا پر سکون نیند کے لیے ضرروی ہے۔ طبی ماہرین کے مطابق سونے سے کم از کم دو سے تین گھنٹے پہلے کھانا نہیں کھانا چاہیے۔سونے کا ایک وقت مقرر کرنا بھی اچھی نیند حاصل کرنے میں مدد کر سکتا ہے۔

ہمارے جسم کو کاربوہائیڈریٹ، پروٹین، چکنائی، وٹامنز، اور نمکیات کی ضرورت ہوتی ہے۔ اس لیے ضروری ہے کہ ایک ایسے کھانوں کو غذا کا حصہ بنایا جائے جن سے یہ تمام اجزا حاصل کی جاسکیں۔ پھلوں، سبزیوں کا استعمال اچھا ہے۔ گوشت کا استعمال اعتدال کے ساتھ کرنا ور دالوں کو بھی غذا میں شامل کرنا ضروری ہے۔

ایک حالیہ تحقیقی کے مطابق روزانہ پینتیس منٹ کی واک وزن کم کرنے میں مدد دے سکتی ہے۔ چاہے کوئی کھیل کھیلا جائے، جم میں مشینوں کے ساتھ ورزش ہو یا پھر صرف واک کسی بھی قسم کی جسمانی ورزش طویل عمر اور اچھی صحت کے لیے انتہائی ضروری ہے۔

نیوزی لینڈ کی یونیورسٹی آف اوٹاگوکی تحقیق میں شامل سائنسدان کا کہنا ہے، ’’ نیند، جسمانی ورزش اور صحت بخش غذا اچھی صحت کی بنیاد ہے اور یہ تینوں عوامل خاص کر نوجوانوں کی مجموعی صحت پر اثر انداز ہوتے ہیں۔‘‘