اٹلی کے فرنینڈو کیمپ میں مہاجرین اچھے وقت کے منتظر

اطالوی علاقے کلیبریا کے باغوں میں اگرچہ کیوی اور سنگتروں کا موسم اب ختم ہو چکا ہے، لیکن اب بھی سینکڑوں افریقی مہاجرین کچھ دن اور کام ملنے کی امید پر عارضی خیموں میں رہ رہے ہیں۔

 سان فرنینڈو مہاجر کیمپ میں تناؤ کچھ روز سے زیادہ ہے۔ اس تناؤ کا سبب افریقی ملک مالی کے ایک انتیس سالہ مہاجر صومالیہ ساکو کی فائرنگ سے ہلاکت ہے۔ ساکو کو گولی اس وقت لگی جب وہ ایک متروکہ خارخانے میں دھات کی شیٹ تلاش کر رہا تھا۔

تفتیش کاروں نے اگرچہ فیکٹری کے مالکان سے تعلق کی بنا پر ساکو کے ایک رشتہ دار کو گرفتار کیا ہے تاہم مرنے والے تارک وطن کے دوستوں کی رائے میں اس قتل کا تانا بانا اطالوی وزیر داخلہ سالوینی کے اُس بیان سے جڑا ہے جس میں انہوں نے ساکو کی موت سے چند گھنٹے قبل ہی کہا تھا،’’ غیر قانونی مہاجرین کے لیے اچھا وقت ختم ہو گیا ہے۔ وہ اپنا سامان باندھ لیں۔‘‘

کیمپ کے رہائشیوں میں سے ایک کا کہنا ہے،’’ وہ ہمیں جانور سمجھتے ہیں اور جانور ہی سمجھ کر مارتے ہیں۔‘‘

اٹلی کے اس مہاجر کیمپ میں تازہ پانی کی سہولت مہیا نہیں اور بجلی بھی پاس سے گزرنے والی تار سے مقدار بھر لی جاتی ہے۔ موسم گرما یہاں کے تارکین وطن کے لیے شدید گرم ہوتا ہے اور سردیوں میں کڑاکے کی سردی برداشت کرنی پڑتی ہے۔

پلاسٹک کی شیٹوں سے ڈھکے کچھ خیموں میں بنی عارضی دکانوں پر مشروبات، کھانے کی اشیاء اور کپڑے دھونے کا پاؤڈر دستیاب ہے جبکہ ایک بڑے سے ٹینٹ پر ’چرچ آف دی افریقی یونین‘ کے الفاظ درج ہیں۔

اٹلی میں اس مہاجر بستی سمیت پوگلیا کے علاقے میں ٹماٹر کے کھیتوں کے قریب قائم چند دیگر کیمپ لاقانونیت کی علامت بن گئے ہیں۔ بنجر اور کھردری زمینوں پر قائم ہونے کی وجہ سے یہاں آئے روز مہاجرین کے زخمی ہونے کے واقعات ہوتے رہتے ہیں۔

تاہم ساکو کی موت تارکین وطن کے حالات میں تبدیلی کا محرک بن سکتی ہے۔ اس مالی مہاجر کی موت پر تین روز تک خاموش رہنے کے بعد نئے اطالوی وزیر اعظم جوزَیپے کونٹے نے منگل کے روز اپنے پہلے عوامی خطاب میں ساکو کو خراج تحسین پیش کیا تھا۔ 

ص ح/اے ایف پی