الطاف حسین کے خلاف انسداد دہشت گردی کے تحت مقدمہ درج

خبر رساں ادارے اے ایف پی نے صوبہ سندھ میں پولیس کے سربراہ کے حوالے سے تصدیق کی ہے کہ لندن میں رہائش پذیر الطاف حسین کے خلاف متعدد مقدمات درج کیے گئے ہیں۔

صوبائی پولیس کے سربراہ کے ترجمان کے مطابق، ’’ایم کیو ایم کے رہنما الطاف حسین پر انسداد دہشت گردی ایکٹ کے سیکشن چھ اور پاکستان پینل کوڈ کی مختلف شقوں کے تحت مقدمات درج کیے گئے ہیں۔‘‘ پاکستان میں متعدد اقسام کے ایسے جرائم بھی انسداد دہشت گردی قوانین کا حصہ ہوتے ہیں، جو براہ راست تشدد کا باعث نہیں بنتے۔

مقامی ذرائع ابلاغ کے مطابق الطاف حسین کے خلاف یہ مقدمات پیر تیرہ جولائی کی شب دائر کیے گئے۔ ان سے ایک روز قبل الطاف حسین نے اتوار کے دن لندن سے ٹیلی فون کے ذریعے کراچی میں اپنے حامیوں سے خطاب کرتے ہوئے ملکی فوج کو تنقید کا نشانہ بنایا تھا۔ اس تقریر میں انہوں نے پیرا ملٹری فورسز پر الزام عائد کیا تھا کہ وہ متحدہ قومی موومنٹ کے کارکنوں پر تشدد اور انہیں ہلاک کرنے کی مرتکب ہو رہی ہیں۔

یہ امر اہم ہے کہ پاکستان میں صوبہ سندھ میں نیم فوجی دستے سیاسی، مذہبی، نسلی اور جرائم پیشہ بنیادوں پر ہونے والے تشدد کو روکنے کے لیے اپنا آپریشن جاری رکھے ہوئے ہیں۔

صوبہ سندھ کے شہری علاقوں کی طاقتور سیاسی جماعت متحدہ قومی موومنٹ پر الزام عائد کیا جاتا ہے کہ وہ اس صوبے میں اپنی گرفت مضبوط رکھنے کے لیے قتل اور اغوا کی وارداتوں میں ملوث ہوتی رہتی ہے۔ دوسری طرف اس سیاسی جماعت کا موقف ہے کہ سکیورٹی فورسز اپنی پرتشدد کارروائیوں سے اس جماعت کی سیاسی بنیادوں کو ہلانا چاہتی ہیں۔

الطاف حسین نے اپنی اس تازہ تقریر میں الزام عائد کیا تھا کہ سندھ میں تعینات رینجرز متحدہ قومی موومنٹ کے کارکنان کو تشدد کا نشانہ بنا رہے ہیں۔ ان کا یہ بھی کہنا تھا کہ پاکستانی فوج کے کچھ عناصر اس قومی ادارے کی بدنامی کا باعث بن رہے ہیں۔

الطاف حسین نے وفاقی حکومت کو بھی تنقید کا نشانہ بنایا تھا۔ الطاف حسین پاکستان میں فعال اس سیاسی جماعت کے سیاسی و انتظامی معاملات لندن میں بیٹھ کر دیکھتے ہیں۔ انہوں نے نوے کی دہائی میں برطانیہ جا کر سیاسی پناہ حاصل کر لی تھی اور کئی سال پہلے وہ برطانوی شہریت بھی حاصل کر چکے ہیں۔