اقوام کی پرامن بقائے باہمی، چانسلر میرکل کے لیے امن انعام

اطالوی دارالحکومت روم سے ملنے والی نیوز ایجنسی اے ایف پی کی رپورٹوں کے مطابق میرکل کو اس امن انعام سے خاص طور پر اس لیے نوازا گیا کہ انہوں نے مختلف اقوام اور نسلی گروپوں کے مابین مفاہمت اور خاص طور پر یورپی سطح پر پرامن بقائے باہمی کے لیے غیر معمولی خدمات انجام دی ہیں۔

جرمنی ایران کے ساتھ جوہری معاہدے پر قائم ہے، میرکل

میرکل اور ٹرمپ : اختلاف رائے پر اتفاق

یہ انعام کلیسائے روم کے فرانسسکن راہبوں کی تنظیم کی طرف سے فرانسس آف اسیسی کی یاد میں دیا جاتا ہے، جو عرف عام میں ’مشعلِ امن‘ کہلاتا ہے۔ آج ہفتہ بارہ مئی کو انگیلا میرکل کو یہ اعزاز اٹلی کے شہر اسیسی میں اسی کیتھولک کلیسائی تنظیم کی طرف سے دیا گیا اور اس موقع پر جرمن سربراہ حکومت کی ان خدمات کو خاص طور پر سراہا گیا، جو وہ اب تک یورپ کے مسلسل اتحاد کے عمل کی ترویج کے لیے انجام دے چکی ہیں۔

وفاقی جرمن چانسلر انگیلا میرکل کے شوہر یوآخم زاؤر بالعموم اپنی اہلیہ کی روزمرہ کی سیاسی مصروفیات سے بہت دور رہتے ہیں لیکن اس اعزاز کے لیے وہ بھی خاص طور پر انگیلا میرکل کے ہمراہ اٹلی میں ٹسکنی کے خطے میں اسیسی میں واقع سان فرانچیسکو بسیلیکا میں موجود تھے۔

برلن میں وفاقی جرمن حکومت کے ترجمان اشٹیفان رائبرٹ نے اس موقع پر چانسلر میرکل کے جذبات کی نمائندگی کرتے ہوئے ٹوئٹر پر ایک پیغام میں انگیلا میرکل کے ان الفاظ کا حوالہ دیا، ’’ایک معتبر امن انعام کی صورت میں یہ اعزاز میرے لیے بڑی عزت کی بات ہے، جو میرے لیے بہت زیادہ اہمیت کا حامل بھی ہے۔‘‘

میرکل سے ٹرمپ کی ایک مشکل ملاقات

لڑکیاں سائنس کی تعلیم حاصل کریں، میرکل

یہ انعام وصول کرتے ہوئے انگیلا میرکل کے الفاظ کا حوالہ دیتے ہوئے جرمن حکومتی ترجمان نے اپنی ایک ٹویٹ میں لکھا، ’’یورپی یونین ایک انتہائی منفرد امن منصوبہ ہے۔ اگر ہم اس بات پر غور کریں کہ ہمارے اس براعظم کی تاریخ کیسی رہی ہے، تو ہم میں سے ہر کوئی دیکھ سکتا ہے کہ ہم اس وقت کتنے خوش قسمت ہیں۔‘‘

اے ایف پی کے مطابق جرمن چانسلر کو یہ انعام دیے جانے کی تقریب میں اسیسی میں موجود مہمانوں میں کولمبیا کے صدر خوآن مانوئل سانتوس بھی شامل تھے، جنہیں دسمبر 2016ء میں یہ انعام ان کی طرف سے اپنے ملک میں فارک باغیوں کی عشروں پرانی مسلح تحریک کے خاتمے کی کوششوں کے اعتراف میں دیا گیا تھا۔

میرکل سے پہلے ’امن کی مشعل‘ کہلانے والا یہ تاریخی انعام جن دیگر سرکردہ شخصیات کو دیا جا چکا ہے، ان میں پولینڈ کے سابق صدر لیخ ولینسا، دلائی لاما، اسرائیل کے سابق صدر شمعون پیریز اور پوپ فرانسس نمایاں ہیں۔

شام میں ممکنہ فوجی کارروائی: جرمنی شامل نہیں ہو گا، میرکل

نئی حکومت سے میرکل کا پہلا خطاب، مہاجرین اور اسلام کا تذکرہ

اس امن انعام کو یہ نام دیے جانے کا پس منظر فرانسسکن راہب فرانسس آف اسیسی کا وہ پیغام ہے، جس میں انہوں نے کہا تھا جب بھی حالات غیر محفوظ اور عدم استحکام کا شکار ہوتے ہیں، تو انسانوں کو اپنے لیے درست راستے کے انتخاب کے لیے روشنی کی ضرورت ہوتی ہے۔

م م / ع س / اے ایف پی