افغانستان میں جرمن جنگجو گرفتار

نیوز ایجنسی اے ایف پی کی رپورٹ کے مطابق اس شخص کو صوبے ہلمند میں افغان اسپیشل فورسز اور افغان ایئر فورس کے فوجیوں نے دیگر مشتبہ افراد کے ہمراہ ایک مشترکہ عسکری آپریشن  کے دوران گرفتار کیا۔ صوبے ہلمند کے صوبائی ترجمان عمر زواک کا کہنا ہے،’’ لمبی داڑھی اور سیاہ پگڑی پہننے والے ایک شخص کو پیر کی رات ایک فوجی آپریشن کے دوران حراست میں لیا گیا ہے۔ یہ شخص خود کو جرمن شہری کہتا ہے اور جرمن زبان بولتا ہے اور اپنا نام عبدالودود بتاتا ہے۔‘‘

مقامی پولیس سربراہ اسماعیل کھپلاک کے مطابق زیر حراست شخص ہلمند میں طالبان کی ’ریڈ یونٹ‘ کے کمانڈر ملا ناصر کا عسکری مشیر تھا۔ اگر اس بات کی تصدیق ہو جاتی ہے، تو یہ ان چند واقعات میں سے ایک ہو گا، جس میں کسی یورپی شہری کو عسکریت  پسندوں کا ساتھ دینے کے دوران گرفتار کیا گیا ہے۔ افغان طالبان کے ساتھ وسطی ایشاء اور عرب ممالک کے جنگجو مغربی افواج کے خلاف لڑتے ہوئے تو دیکھے گئے ہیں لیکن شاذ و نادر ہی کوئی یورپی شہری اس لڑائی کا حصہ بنا ہے۔

اے ایف پی کی رپورٹ کے مطابق گزشتہ برس ایسی خبریں منظر عام آئی تھیں جن کے مطابق افغانستان میں موجود دہشت گرد تنظیم اسلامک اسٹیٹ میں کچھ فرانسیسی شہری شامل تھے۔اس تناظر میں جان واکر لندھ نامی ایک جنگجو نے بھی کافی شہرت حاصل کی تھی۔ اسے ’امریکی طالبان‘ کے نام سے جانا جاتا تھا اور سن 2002 میں اسے 20 سال قید کی سزا سنائی گئی تھی۔ افیون کی کاشت کے حوالے سے مشہور صوبے ہلمند کا زیادہ تر حصہ طالبان کے کنٹرول میں ہے۔