افغانستان: افیون کے نئے بیج، دُگنی پیدوار متوقع

افیون کے کاشتکاروں کے مطابق اس بیج سے پیدا شدہ پودے تیزی سے بڑھتے ہیں اور انہیں پانی کی ضرورت بھی کم ہوتی ہے جبکہ اس سے حاصل ہونے والی افیون کی مقدار بھی دو گنا تک متوقع ہے۔

خبر رساں ادارے ایسوسی ایٹد پریس کے مطابق ملکی حکام اس بات سے لا علم ہیں کہ افیون کا یہ بہتر بیج کہاں سے آیا۔ افیون کی کاشت کے حوالے سے سرفہرست صوبوں قندھار اور ہلمند کے کسانوں کا تاہم کہنا ہے کہ انہیں رواں برس کے آغاز میں فصل کاشت کرنے کے لیے یہ بیج ان افراد کی جانب سے براہ راست فراہم کیا گیا جو فصل کٹنے کے بعد افیون وصول کرنے آتے ہیں اور انہیں اس کے لیے تمام ضروری ساز و سامان، کھاد، کاشتکاری سے متعلق مشورے اور سب سے اہم بات یہ کہ ایڈوانس رقم تک فراہم کرتے ہیں۔

اقوام متحدہ کے منشیات اور جرائم کے خلاف ادارے UNODC کے مطابق افغانستان میں افیون کی کاشت کی سالانہ مالیت تین بلین امریکی ڈالرز کے برابر بنتی ہے۔ اسی افیون سے دنیا بھر میں استعمال ہونے والی زیادہ تر ہیروئن تیار کی جاتی ہے۔ اس ادارے کے مطابق گزشتہ برس یعنی 2014ء کے دوران افغانستان میں ہیروئن کی پیداوار میں ریکارڈ اضافہ ہوا جو اس سے ایک سال پہلے کی نسبت 17 فیصد زائد تھا۔

مقامی حکام کے مطابق رواں برس اس پیداوار میں مزید اضافہ متوقع ہے اور گزشتہ برس کی پیدوار 7800 میٹرک ٹن سے مجموعی طور پر سات فیصد زائد پیداوار کا امکان ہے جبکہ قندھار اور ہلمند کے صوبوں میں یہ اضافہ 22 فیصد تک رہنے کی امید ہے۔

افغانستان میں افیون کے پودوں کی کاشت غیر قانونی ہے اور ملک کے زیادہ تر عوام کا مذہب اسلام بھی اس کی کاشت سے منع کرتا ہے تاہم افغان کسانوں کے پاس اس کی کاشتکاری کے علاوہ کوئی اور چارہ بھی نہیں ہے۔ افغان حکومت اور بین الاقوامی ادارے ان کاشتکاروں کو گندم، پھلوں اور یہاں تک کہ زعفران کی کاشت تک کے لیے بیج اور صلاح و مشورے فراہم کرنے کا پروگرام بھی شروع کر چکے ہیں مگر اس کے خاطر خواہ نتائج برآمد نہیں ہو سکے ہیں۔

ماہرین کے مطابق طالبان جو افغان حکومت کے خلاف جنگ جاری رکھے ہوئے ہیں، اپنی فنڈنگ کا زیادہ تر حصہ افیون کی کاشت اور اس کی فروخت سے حاصل کرتے ہیں۔ حالیہ دنوں میں ہونے والی شدید جھڑپوں کی وجہ بھی یہی سمجھی جا رہی ہے کہ طالبان منشیات کی ترسیل کے لیے استعمال ہونے والے راستوں کے تحفظ کو یقینی بنانا چاہتے ہیں۔

قندھار میں انسداد منشیات کے ادارے کے سربراہ گُل محمد شکران کے مطابق نیا بیج دراصل منشیات کے اسمگلروں کے ذریعے کسانوں تک پہنچا ہے مگر انہیں یہ معلوم نہیں ہے کہ یہ دراصل تیار کہاں کیا گیا ہے۔ ایسوسی ایٹڈ پریس سے گفتگو کرتے ہوئے ان کا کہنا تھا، ’’یہ ہر ایک کے لیے ایک خطرہ ہے‘‘۔ ان کا کہنا تھا کہ افغانستان کی وفاقی حکومت ان کی طرف سے بر وقت متنبہ کرنے کے باوجود بھی کچھ نہیں کر پائی۔

UNODC کے افغانستان کے لیے سربراہ آندرے اویتِسیان Andrey Avetisyan کے بقول کابل حکومت کو بین الاقوامی تعاون کے ساتھ ایسی فصلیں متعارف کرانے کے راستے تلاش کرنا ہوں گے جو افیون کے مقابلے میں کاشتکاروں کو زیادہ منافع فراہم کر سکیں۔ ایسوسی ایٹد پریس کے مطابق فی الحال اس بات کا کوئی امکان نظر نہیں آتا لہٰذا افیون کی کاشت کا غیرقانونی سلسلہ بدستور جاری رہے گا۔