آسکر کے لیے مقابلہ

اس ایوارڈ کے لیے ڈرامہ فلم ’برڈمین‘ (تصویر) اور جرمن برطانوی کامیڈی فلم ’دی گرینڈ بڈاپسٹ ہوٹل‘‘ کو فیورٹ قرار دیا جا رہا ہے۔ اس کے علاوہ اس دوڑ میں ’امیٹیشن گیم‘ اور بارہ برسوں میں بنائی جانے والی فلم ’بوئے ہوڈ‘ بھی شامل ہیں۔ امیرکن سپائے کو بھی نامزد کیا گیا ہے۔

بہترین ڈائریکٹر کا آسکر ایوارڈ ’رچرڈ لنک لیٹر‘ اور’ ویس اینڈرسن‘ کو مل سکتا ہے۔ رچرڈ لنک لیٹر فلم ’بوائے ہوڈ‘ کے ڈائریکٹر ہیں جبکہ ویس اینڈرسن برطانوی کامیڈی فلم ’دی گرینڈ بڈاپسٹ ہوٹل‘‘ کے ہدایتکار ہیں۔ فلم برڈمین اور ’امیٹیشن گیم‘ کے ہدایتکار بھی اس دوڑ میں شامل ہیں۔

فلم ’امیٹیشن گیم‘ میں ایک ریاضی دان کا کردار ادا کرنے والے بینیڈکٹ کومبربیچ (تصویر) بہترین مرکزی اداکار کا آسکر ایوارڈ حاصل کرنے کے لیے فیورٹ ہیں۔ ان کا مقابلہ ایڈی ریڈمائن سے ہے، جنہوں نے فلم ’تھیوری آف ایوری تِھنگ‘ میں ماہر طبیعیات اسٹیفن ہاکنگ کا کردار ادا کیا ہے۔ مائیکل کیٹن، سٹیو کاریل اور بریڈلی کوپر بھی اس دوڑ میں شامل ہیں۔

جولیان مور کا شمار ہالی وڈ کی بہترین اداکاراؤں میں ہوتا ہے۔ مور نے ’سٹِل ایلس میں ایک بیمار خاتون سائنسدان کا کردار ادا کیا ہے، جس کی وجہ سے انہیں آسکر کے لیے فیورٹ قرار دیا جا رہا ہے۔ اس دوڑ میں ریس ویترسپون، فلیسیٹی جونز، روزامنڈ پائک اور ماریون کوتیلارڈ بھی شامل ہیں۔

ایتھن ہاکس کو بوائے ہڈ میں ایک غیرذمہ دار باپ کا کردار ادا کرنے پر بہترین معاون اداکار کے آسکر ایوارڈ کے لیے نامزد کیا گیا ہے۔ ان کے مد مقابل برڈمین میں معاون اداکار کا کردار ادا کرنے والے ایڈورڈ نورٹن، جے کے سیمنز، مارک روفلو اور رابرٹ ڈوال ہوں گے۔

ہالی وڈ کی دنیا میں اداکارہ میریل سٹریپ نے جتنے انعامات حاصل کیے ہیں شاید ہی کسی دوسری اداکارہ کے حصے میں آئے ہوں۔ فلم ’اِن ٹو دی ووڈز‘ میں انہوں نے ایک چڑیل کا کردار ادا کیا ہے، جس پر انہیں اس آسکر کے لیے نامزد کیا گیا ہے۔ ان کا مقابلہ بوائے ہوڈ میں کردار ادا کرنے والی پیٹریسیا آرکوئٹ اور برڈ مین میں اپنی اداکاری کے جوہر دکھانے والی ایما اسٹون سے ہوگا۔

’سیٹیزن فور‘ کے نام سے بننے والی فلم امریکی خفیہ دستاویزات منظر عام پر لانے والے ایڈورڈ سنوڈن پر بنائی گئی ہے۔ اس کے علاوہ بہترین دستاویزی فلم کے ایوارڈ کے لیے ’دی سالٹ آف دا ارتھ‘، ’لاسٹ ڈیز آف ویتنام‘، ’وی رونگا‘ اور ’فائنڈنگ ووین مائیر‘ کو نامزد کیا گیا ہے۔

اس مرتبہ اس ایوارڈ کے لیے ’ہاؤ ٹو ٹرین یور ڈریگن ٹو‘ کو فیورٹ قرار دیا جا رہا ہے۔ اسی طرح بچوں کے لیے بنائی گئی دیگر فلموں ’دا باکس ٹرول‘، بِگ ہیرو 6‘ اور ’دی ٹیل آف دا پرنسِس کاگویا‘ کو نامزد کیا گیا ہے۔