آسٹریلیا: پولیس کو نقاب اتروانے کے اختیارات

آسٹریلیا کی حکومت نے اپنی پولیس کو یہ اختیار دیا ہے کہ وہ اگر جرائم کی روک تھام کے لیے یہ ضروری سمجھیں کہ کسی خاتون کے چہرے کی شناخت ہونی چاہیے تو وہ اس خاتون کو برقعہ اتارنے کا حکم دے سکیں۔

آسٹریلوی حکومت نے یہ فیصلہ پیر کے روز اس واقعے کے بعد دیا جب ایک عدالت کی جج نے ایک مسلمان خاتون کو اس بنا پر بری کر دیا کہ برقعے کے باعث اس کے چہرے کی شناخت نہیں ہو سکتی۔

حکومتی ترجمان کا کہنا ہے کہ ان کو اِس بات کی پرواہ نہیں کہ کسی شخص نے موٹر سائیکل کا ہیلمٹ پہنا ہوا ہے یا برقعہ یا نقاب، یا پھر کوئی اور چیز، پولیس کو اس بات کی اجازت ہونی چاہیے کہ وہ چہرے کی شناخت کر سکے۔ فیصلے کے مطابق اگر کوئی اپنا چہرہ دکھانے سے انکار کرے تو اس پر ساڑھے پانچ ہزار آسٹریلوی ڈالر کا جرمانہ کر دیا جائے۔

آسٹریلیا میں نومبر دو ہزار دس میں ایک کیس سامنے آیا تھا جس میں کیرنیٹا میتھیوس نامی ایک خاتون کو چھ ماہ کی قید کی سزا پولیس پر یہ جھوٹا الزام عائد کرنے کے الزام میں سنائی تھی کہ پولیس نے زبردستی اس کا برقعہ اتروانے کی کوشش کی۔ خاتون ٹریفک کی خلاف ورزی کر رہی تھیں۔ تاہم گزشتہ مہینے کیرنیٹا میتھیوس کو عدالت نے اس لیے رہا کر دیا کہ جج کا کہنا تھا کہ وہ سو فیصد قائل نہیں کہ یہ خاتون کیرنیٹا میتھیوس ہی ہے، کیونکہ پولیس اس کا چہرہ نہیں دیکھ سکی تھی۔

حکومتی ترجمان کے مطابق آسٹریلیا میں تمام مذاہب کا احترام کیا جاتا ہے مگر کسی شخص کو قانون کی خلاف ورزی کی اجازت نہیں دی جا سکتی۔

نیو ساؤتھ ویلز کی اسلامی کونسل نے اس فیصلے کو تسلیم کیا ہے۔ خواتین کی بعض اسلامی تنظیموں کا کہنا ہے کہ برقعے اتروا کر خاتون کا چہرہ دیکھنے کے لیے خاتون پولیس اہلکار کی خدمت حاصل کی جانی چاہیے۔

رپورٹ: شامل شمس⁄ خبر رساں ادارے

ادارت: ندیم گِل