حالات حاضرہ
کراچی جلسہ، پی ڈی ایم کا پنجاب کے بعد سندھ میں پاور شو
پاکستان ڈیموکریٹک موومنٹ کے بینر تلے پاکستان کی قریب تمام ہی قابل ذکر جماعتیں آج ملک کے جنوبی صوبہ سندھ کے دارالحکومت کراچی میں متحد ہو کر اپنی طاقت کا مظاہرہ کر رہی ہیں۔
ملک کا معاشی دارالحکومت کہلانے والا اور آبادی کے لحاظ سے سب سے بڑا شہر کراچی آج پاکستانی اپوزیشن جماعتوں کی سرگرمیوں کا مرکز بنا ہوا ہے۔ پاکستان ڈیموکریٹک موومنٹ کے نام سے 11 اہم ترین سیاسی جماعتوں کا یہ اپوزیشن اتحاد وزیر اعظم عمران خان کی حکومت کے خلاف سراپا احتجاج ہے اور ساتھ ہی ملکی سیاست میں فوج کے کردار پر بھی خاص طور پر آواز اٹھائی جا رہی ہے۔ پی ڈی ایم کا دوسرا پاور شو آج 18 اکتوبر کو کراچی کے باغ جناح میں جاری ہے۔
جنرل باجوہ صاحب آپ کو جواب دینا پڑے گا، نواز شریف
نواز شریف خود فوج کے ذریعے ہی اقتدار تک پہنچے، عمران خان
کراچی جلسے میں شرکت کرنے والے اہم رہنما
اس جلسے میں شرکت کے لیے پی ڈی ایم کے مرکزی رہنما جلسے گاہ پہنچ رہے ہیں۔ ان رہنماؤں میں پاکستان پیپلز پارٹی کے بلاول بھٹو زرداری، پاکستان مسلم لیگ نون کی نائب صدر مریم نواز، سابق وزیر اعظم شاہد خاقان عباسی، احسن اقبال شامل ہیں۔ جمیعت علمائے اسلام فضل الرحمان گروپ کے سربراہ مولانا فضل الرحمان کے علاوہ دیگر رہنماؤں میں مولانا شاہ اویس نورانی، ساجد میر اور ڈاکٹر عبدالمالک وغیرہ شامل ہیں۔ مریم نواز کراچی پہنچ چکی ہیں اور جلسہ گاہ جانے سے قبل وہ بانی پاکستان محمد علی جناح کے مقبرے پر بھی گئیں۔
جلسے کے لیے دن ساڑھے چار بجے کا وقت دیا گیا تھا۔ اس مقصد کے لیے روشنی وغیرہ کا بھی خصوصی انتظام کیا گیا ہے اس لیے خیال ہے کہ جلسہ رات دیر تک جاری رہے گا۔ باغ جناح میں سیاسی کارکنوں کی بڑی تعداد اپنی اپنی سیاسی جماعتوں کے پرچموں کے ساتھ جمع ہیں۔
'پاکستان جہاں عدلیہ اور میڈیا آزاد ہوں‘
اس جلسے کے حوالے سے پاکستان پیپلز پارٹی کے چیئر مین بلاول بھٹو زرداری نے گزشتہ روز وزیر اعلیٰ سندھ سید مراد علی شاہ اور دیگر پارٹی اور حکومتی رہنماؤں کے ساتھ جلسہ گاہ کا دورہ کیا۔ اس موقع پر انہوں نے دعویٰ کیا کہ پاکستان پیپلز پارٹی کراچی میں تاریخی جلسہ کرے گی۔ ان کا کہنا تھا کہ ان کی جماعت ایک ایسے آزاد پاکستان کے لیے کوشش جاری رکھے گی جہاں عدلیہ اور میڈیا آزاد ہوں۔
باغ جناح کراچی میں ہونے والے اس جلسے سے بھی متوقع طور پر پاکستان مسلم لیگ نون کے رہنما اور ملک کے سابق وزیر اعظم محمد نواز شریف بھی ویڈیو لنک کے ذریعے لندن سے خطاب کریں گے۔ نواز شریف نے جمعہ 16 اکتوبر کو گوجرانوالہ میں ہونے والے جلسے میں پاکستان کی اسٹیبلشمنٹ کو شدید تنقید کا نشانہ بناتے ہوئے پاکستانی فوج کے سربراہ جنرل قمر جاوید باجوہ پر سنگین الزامات عائد کیے تھے۔
پاکستان پیپلز پارٹی کے چیئرمین بلاول بھٹو زرداری کے مطابق ان کی جماعت ایک ایسے آزاد پاکستان کے لیے کوشش جاری رکھے گی جہاں عدلیہ اور میڈیا آزاد ہوں۔
پی ٹی ایم کے رہنما محسن داوڑ کی شرکت
آج کراچی میں ہونے والے پی ڈی ایم کے جلسلے میں پشتوں تحفظ موومنٹ پی ٹی ایم کے رہنما محسن داوڑ بھی شریک ہو رہے ہیں۔ اس حوالے سے پی ٹی ایم کے ایک رکن احسن داوڑ نے امید ظاہر کی کراچی جلسے میں پشتونوں کے مسائل پر بھی بات ہو گی۔
- تاریخ 18.10.2020
- مصنف افسر اعوان
- موضوعات نواز شریف, پاکستانی حکومت, خیبر پختونخوا
- ایک یا ایک سے زیادہ کلیدی الفاظ درج کریں پاکستان, پی ڈی ایم, پی ٹی ایم, کراچی, باغ جناح, اپوزیشن
- Feedback: فیڈ بیک
- پرنٹ کریں یہ صفحہ پرنٹ کریں
- پیرما لنک https://p.dw.com/p/3k68H
ملتے جلتے مندرجات
- تاریخ 18.10.2020
- مصنف افسر اعوان
- موضوعات نواز شریف, پاکستانی حکومت, خیبر پختونخوا
- ایک یا ایک سے زیادہ کلیدی الفاظ درج کریں پاکستان, پی ڈی ایم, پی ٹی ایم, کراچی, باغ جناح, اپوزیشن
- فیڈ بیک
- پرنٹ کریں یہ صفحہ پرنٹ کریں
- پیرما لنک https://p.dw.com/p/3k68H
