چین: شنگھائی کی ایک سُپر مارکیٹ میں چاقو حملہ

مقامی حکام نے منگل کو بتایا کہ شنگھائی کی ایک سُپر مارکیٹ میں چاقو کے حملے میں تین افراد ہلاک اور  دیگر 15 زخمی ہو گئے ہیں۔ اس تناظر میں ایک مشتبہ شخص کو حراست میں لے لیا گیا ہے۔

سونگ جیانگ پولیس برانچ نے بتایا کہ تمام 18 متاثرین کو ہسپتال لے جایا گیا، جہاں تین افراد زخموں کی تاب نہ لاتے ہوئے دم توڑ گئے۔

پولیس نے مزید کہا کہ 37 سالہ ملزم، جس کا آخری نام لین ہے، مالی مشکلات کا شکار تھا اور ''اپنا غصہ نکالنے‘‘ کے لیے شنگھائی آیا تھا اور اس سے مزید تفتیش جاری ہے۔

جرمنی کے شہر زیگن میں چاقو حملہ، پانچ افراد زخمی

چین میں چاقو سے جرائم کا سلسلہ

یہ حملہ چین کے قومی دن کی تقریبات کے موقع پر کیا گیا ہے۔ چین میں اس سال کئی ہائی پروفائل چاقو حملے دیکھے گئے ہیں۔ گزشتہ ماہ جنوبی چین میں ایک 10 سالہ جاپانی طالب علم کو اس کے اسکول کے قریب قتل کر دیا گیا تھا۔

اس سال کے شروع میں ایک چینی شہری ایک دوسرے جاپانی اسکول کے قریب اُس وقت ہلاک ہو گیا تھا، جب اس نے ایک حملہ آور کو روکنے کی کوشش کی، جس نے ایک جاپانی ماں اور بچے کو زخمی کر دیا تھا۔

اس سے قبل 2024 میں ہی ایک چینی شخص نے ایک امریکی یونیورسٹی کے چار انسٹرکٹرز اور ایک چینی شخص کو چاقو مارتے ہوئے زخمی کر دیا تھا۔

ا ا / ا ب ا (اے پی، روئٹرز)