چیمپیئنز ٹرافی: مصباح، رام دین پر برہم | کھیل | DW | 08.06.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

کھیل

چیمپیئنز ٹرافی: مصباح، رام دین پر برہم

پاکستانی کرکٹ ٹیم کے کپتان مصباح الحق نے گزشتہ روز ویسٹ انڈیز کے ساتھ میچ کے دوران مخالف ٹیم کے وکٹ کیپر دنیش رام دین کی طرف سے غلط کیچ کا مطالبہ کرنے پر برہمی کا اظہار کیا ہے۔

default

مصباح الحق نے لندن کے اوول گراؤنڈ پر کھیلے جانے والے اس میچ میں اپنے کیریئر کے بہترین 96 رنز اسکور کیے اور ناقابل شکست رہے، تاہم وہ اپنی ٹیم کو شکست سے نہ بچا سکے۔ چیمپیئنز ٹرافی کے گروپ بی کے اس میچ میں پاکستانی ٹیم ویسٹ انڈیز کے ہاتھوں دو وکٹوں سے ہار گئی تھی۔

میچ میں تین وکٹیں حاصل کرنے والے ویسٹ انڈین بولر کیمر روچ کی گیند پر وکٹ کیپر دنیش رام دین نے مصباح الحق کا کیچ پکڑنے کی اپیل کی جس پر آسٹریلوی ایمپائر اسٹیو ڈیوِس نے مصباح کو آؤٹ قرار دے دیا۔ اس وقت پاکستان کا مجموعی اسکور 17 تھا جبکہ اس وقت تک اس کی تین وکٹیں گِر چکی تھیں۔

دنیش رام دین کا خیال تھا کہ اس نے ایمانداری سے گیند کو پکڑ لیا تھا، ڈیوین براوو

دنیش رام دین کا خیال تھا کہ اس نے ایمانداری سے گیند کو پکڑ لیا تھا، ڈیوین براوو

تاہم اسکوئر لیگ پر موجود انگلش آفیشل نیگل لونگ Nigel Llong کی طرف سے توجہ دلانے کے بعد یہ معاملہ تھرڈ ایمپائر ٹونی ہِل کو ریفر کر دیا گیا۔ مذکورہ گیند کا ری پلے دیکھنے سے اندازہ ہوا کہ رام دین نے شروع میں کیچ پکڑا ضرور تھا مگر پھر وہ اسے سنبھال نہ سکے اور وہ گیند ان کے دستانوں سے گِر گئی تھی۔ لہذا فیصلہ مصباح کے حق میں آیا اور انہیں آؤٹ دیے جانے کا فیصلہ واپس لے لیا گیا۔ اگر مصباح اس وقت آؤٹ قرار دے دیے جاتے تو پاکستان کے محض 17 اسکور پر چار وکٹیں گِر چکی ہوتیں۔

اس کے بعد مصباح نے 96 رنز کی اننگز کھیلی اور پاکستان کے ٹوٹل کو 170 رنز کے ایک مناسب ٹوٹل تک لے جانے میں کامیاب ہوئے۔

میچ کے بعد مصباح الحق کا کہنا تھا، ’’میں کیا کہہ سکتا ہوں، اسے (رام دین کو) بتانا چاہیے تھا کہ ہوا کیا ہے۔ مجھے نہیں معلوم کہ وہ اس وقت کیا سوچ رہا تھا۔‘‘ مصباح کا مزید کہنا تھا، ’’میرا نہیں خیال کے اگر میرا وکٹ کیپر ایسا کرے گا تو میں خوش ہوں گا۔ اگر آپ کو معلوم نہیں ہے کہ یہ کیچ تھا تو کوئی مسئلہ نہیں۔ لیکن اگر آپ کو معلوم ہے کہ یہ کیچ نہیں تھا تو پھر آپ کو اس کیچ کو پکڑنے کا دعویٰ نہیں کرنا چاہیے کیونکہ یہ کھیل کی روح کے خلاف ہے۔

اوپنر ناصر جمشید نے 50 رنز بنائے

اوپنر ناصر جمشید نے 50 رنز بنائے

ویسٹ انڈین کپتان ڈیوین براوو نے رام دین کا دفاع کرتے ہوئے کہا کہ کیپر کو واقعی اس بات کا یقین تھا کہ اس نے کیچ کو اتنے وقت تک پکڑے رکھا تھا کہ وہ اس کی اپیل کر سکے: ’’دنیش کا خیال تھا کہ اس نے ایمانداری سے گیند کو پکڑ لیا تھا۔‘‘ براوو کا مزید کہنا تھا کہ رام دین ایک ایماندار کھلاڑی ہے اور تاریخ گواہ ہے کہ ویسٹ انڈیز نے کبھی منفی کھیل کا مظاہرہ نہیں کیا۔

قبل ازیں لندن کے اوول گراؤنڈ پر کھیلے جانے والے اس میچ میں ڈاوین براوو نے ٹاس جیت کر پاکستان کو کھیلنے کی دعوت دی۔ پاکستان کی پہلی تین وکٹیں محض 15 کے اسکور تک گر چکی تھیں۔ اوپنر ناصر جمشید نے 50 رنز بنائے جبکہ مصباح الحق 96 رنز کے ساتھ ناٹ آؤٹ رہے۔

پاکستان کو اب سیمی فائنل مرحلے تک پہنچنے کے لیے اپنے گروپ میں شامل بھارت اور جنوبی افریقہ کو شکست دینا ہوگی۔ آج ہفتہ آٹھ جون کو گروپ اے کے میچ میں انگلینڈ اور آسٹریلیا مدمقابل ہوں گے۔

aba/as (AFP)