پاکستان مؤثر امریکی ایرانی مکالمت کی میزبانی کے لیے دباؤ میں

فروری کی 28 تاریخ کو ایران پر امریکہ اور اسرائیل کے فضائی حملوں کے ساتھ شروع ہونے والی اور اب تک جاری ایران جنگ میں پاکستان سفارتی سطح پر بطور ثالث اپنی کوششیں تیز تر کر چکا ہے اور اس مقصد کے لیے امریکہ اور ایران دونوں کے ساتھ اپنے اسٹریٹیجک تعلقات کو اسلام آباد اپنی سفارتی کامیابی کی سیڑھی بنانا چاہتا ہے۔

ٹرمپ کا ایرانی جزیرے خارگ کے آئل ٹرمینل پر قبضے پر غور

گزشتہ اتوار 29 مارچ کے روز اسلام آباد میں پاکستان، سعودی عرب، ترکی اور مصر کے وزرائے خارجہ کا اس جنگ میں ثالثی کوششوں کے حوالے سے جو مشاورتی اجلاس ہوا، اس میں تہران اور واشنگٹن کے مابین ممکنہ مذاکرات کے لیے راہ ہموار کرنے پر تبادلہ خیال تو کیا گیا، تاہم اس جنگی تنازعے کی شدت میں کمی کے تاحال کوئی آثار دکھائی نہیں دے رہے۔

اسلام آباد میں اس چار ملکی وزراتی اجلاس کے بعد پاکستانی وزیر خارجہ اور نائب وزیر اعظم اسحاق ڈار نے یہ بات بہرحال کھل کر کہی تھی، ''پاکستان کے لیے یہ بڑے اعزاز کی بات ہو گی کہ وہ امریکہ اور ایران کے مابین آئندہ دنوں میں بامعنی مذاکرات میں مدد کرتے ہوئے اس مکالمت کی میزبانی کر سکے۔‘‘

اسحاق ڈار نے کوئی تفصیلات بتائے بغیر کہا تھا، ''پاکستان اس بارے میں بہت خوش ہے کہ ایران اور امریکہ دونوں نے ہی ان مذاکرات میں معاونت کے لیے پاکستان پر اپنے اعتماد کا اظہار کیا ہے۔‘‘

مذاکرات براہ راست یا بالواسطہ؟

ان ممکنہ امریکی ایرانی مذاکرات کے بارے میں ابھی تک یہ پہلو غیر واضح ہے کہ آیا یہ بات چیت براہ راست ہو گی یا بالواسطہ؟ اس کے علاوہ تہران اور واشنگٹں دونوں میں سے کسی نے بھی خاص طور پر یہ تصدیق بھی نہیں کی کہ یہ مکالمتی کوششیں لازمی طور پر آگے بڑھیں گی۔

یہ بات بھی اہم ہے کہ ایک دوسرے کے بارے میں جاری کیے جانے والے اور تاحال اپنے متضاد بیانات میں دونوں ہی ممالک ان مذاکراتی کوششوں سے متعلق مختلف دعوے کر رہے ہیں۔

پاکستان اور افغانستان کے مابین شدید سرحدی فائرنگ کا تبادلہ

ایران اس سے قبل ممکنہ جنگ بندی کے لیے امریکہ کے تجویز کردہ اس 15 نکاتی امن منصوبے کو رد کر چکا ہے، جو تہران تک واشنگٹن کی طرف سے اسلام آباد نے پہنچایا تھا۔ تہران نے اس امریکی پلان کو ''مبالغہ آمیز، نامناسب اور غیر حقیقت پسندانہ‘‘ قرار دیا تھا۔

ان امن تجاویز میں ایران سے دیگر باتوں کے ساتھ ساتھ یہ امریکی مطالبات بھی کیے گئے تھے کہ تہران اپنا یورینیم کی افزودگی کا پروگرام مکمل طور پر ختم کر دے، اپنی جوہری تنصیبات منہدم کر دے اور ساتھ ہی خلیج فارس میں آبنائے ہرمز کو معمول کی تجارتی جہاز رانی کے لیے دوبارہ کھول دے۔

ایرانی وزارت خارجہ کا موقف

ایرانی وزارت خارجہ کے ترجمان اسماعیل بقائی نے کل پیر 30 مارچ کو ایک بریفنگ میں امریکی صدر ڈونلڈ ٹرمپ کی طرف سے کیے گئے دعووں کو مسترد کرتے ہوئے کہا تھا کہ امریکہ اور ایران کے مابین جنگ کے خاتمے کے لیے کوئی براہ راست مذاکرات نہیں ہو رہے۔

اسماعیل بقائی کے الفاظ میں، ''ہم نے ابھی تک کوئی براہ راست بات چیت نہیں کی۔‘‘

پاکستان میں ایران جنگ سے متعلق مذاکرات، آبنائے ہرمز پر توجہ

اس ایرانی موقف کے برعکس امریکی صدر ڈونلڈ ٹرمپ حالیہ دنوں میں اپنے طور پر بار بار کہتے رہے ہیں کہ ایران کے ساتھ امریکی مذاکرات میں ''پیش رفت‘‘ ہو رہی ہے۔ مگر پھر اپنی پیر کی رات ایک تازہ سوشل میڈیا پوسٹ میں امریکی صدر نے ایک بار پھر دھمکی دیتے ہوئے کہا کہ اگر تہران کے ساتھ کوئی ''ڈیل‘‘ بہت جلد طے نہ پائی اور ایران نے آبنائے ہرمز کو دوبارہ نہ کھولا،تو امریکہ ایران کے توانائی کے بنیادی ڈھانچوں کو تباہ کر کے رکھ دے گا۔

پاکستان توازن قائم کرنے کی کوشش میں

ان حالات میں اپنی ثالثی کوششیں جاری رکھتے ہوئے پاکستانی حکومت کا ہدف یہ ہے کہ وہ واشنگٹن اور تہران دونوں کے ساتھ اپنے بہت اچھے سفارتی تعلقات کو استعمال کرتے ہوئے کسی جنگ بندی معاہدے کو یقینی بنانے میں کامیاب ہو جائے۔

امریکہ میں مقیم پاکستانی تجزیہ کار رضا رومی نے اس بارے میں ڈی ڈبلیو کو بتایا، ''پاکستان کی اگر توانائی کی سپلائی اور تارکین وطن پاکستانیوں کی طرف سے وطن بھیجی جانے والی رقوم کو دیکھا جائے، تو اسلام آباد کا خلیجی عرب ممالک پر اقتصادی انحصار ناقابل تردید ہے۔ اسی لیے ایرانی امریکی تنازعہ براہ راست پاکستانی معیشت کے لیے بھی بڑا خطرہ ہے۔‘‘

ٹرمپ ٹیرفس، بند سرحدیں اور تعطل کا شکار جنوبی ایشیائی تجارت

دوسری طرف پاکستان کے لیے یہ بھی ناگزیر ہے کہ وہ اپنی سفارتی کوششوں میں بڑی احتیاط سے کام لے۔ اس وجہ سے کہ ایک طرف تو اس نے سعودی عرب کے ساتھ بھی ایک دفاعی معاہدہ کر رکھا ہے اور دوسری طرف اس کے ایران کے ساتھ نہ صرف قریبی ثقافتی تعلقات ہیں بلکہ ایک ہمسائے کے طور پر پاکستان کی قریب 900 کلومیٹر (559 میل) طویل زمینی سرحد بھی ایران سے ملتی ہے۔

رضا رومی کے مطابق، ''پاکستان اپنی ثالثی کوششوں سے نہ صرف خود کو استحکام کی ترویج کے لیے فعال کردار کے طور پر پیش کر رہا ہے، بلکہ دوسری طرف وہ خود کو ان منفی اثرات سے بھی بچانا چاہتا ہے، جس کا اسلام آباد کو اس جنگ کے پھیل کر علاقائی تنازعہ بن جانے کی صورت میں سامنا کرنا پڑ سکتا ہے۔‘‘

پاکستانی امریکی تعلقات

امریکی صدر ڈونلڈ ٹرمپ کی دوسری مدت صدارت کے دوران اسلام آباد اور واشنگٹن کے باہمی تعلقات مزید مضبوط ہوئے ہیں۔ صدر ٹرمپ دو مرتبہ پاکستانی فوج کے سربراہ فیلڈ مارشل عاصم منیر سے ملاقات کر چکے ہیں جبکہ پاکستانی وزیر اعظم سے بھی ان کی مجموعی طور پر متعدد ملاقاتیں ہو چکی ہیں۔ ڈونلڈ ٹرمپ تو ایک سے زائد مرتبہ عاصم منیر کو ''میرا پسندیدہ فیلڈ مارشل‘‘ بھی قرار دے چکے ہیں۔

پاکستان پیر کو مشرقِ وسطیٰ جنگ پر مذاکرات کی میزبانی کرے گا، دفتر خارجہ

اس تناظر میں ماضی میں اٹلانٹک کونسل نامی تھنک ٹینک اور مڈل ایسٹ انسٹیٹیوٹ سے وابستہ رہنے والی اور پاکستانی ایرانی تعلقات سے جڑے امور کی ماہر فاطمہ امان نے ڈی ڈبلیو کو بتایا کہ پاکستان کا شمار ان چند ممالک میں ہوتا ہے، جن کی بات تہران اور واشنگٹن دونوں ہی توجہ سے سنتے ہیں۔

امریکہ ایران کشیدگی میں پاکستان غیرمتوقع ثالث مگر کیسے؟

انہوں نے کہا کہ پاکستان ایران جنگ ختم کرانے کے لیے اس وجہ سے بھی بہت فعال ہے کہ وہ اس تنازعے کے اپنے ہاں ممکنہ داخلی سماجی اور سیاسی نتائج سے بھی بچنا چاہتا ہے۔

فاطمہ امان نے ڈی ڈبلیو کو بتایا، ''پاکستان کو جلدی اس وجہ سے بھی ہے کہ ایران میں عدم استحکام براہ راست پاکستان کو متاثر کرے گا، خاص طور پر صوبے بلوچستان میں سلامتی کی صورت حال کے لحاظ سے اور انرجی سکیورٹی کے ساتھ ساتھ مجموعی داخلی استحکام  کے حوالے سے بھی۔‘‘

ادارت: شکور حیم