پاکستان طے شدہ ايکشن پلان پر عملدرآمد يقينی بنائے، واچ ڈاگ | حالات حاضرہ | DW | 22.06.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اشتہار

حالات حاضرہ

پاکستان طے شدہ ايکشن پلان پر عملدرآمد يقينی بنائے، واچ ڈاگ

فنانشل ايکشن ٹاسک فورس نے طے شدہ اقدامات نہ کرنے پر پاکستان کو خبردار کيا ہے اور مناسب کارروائی کے ليے اکتوبر تک کا وقت ديا ہے۔ پاکستان کی جانب سے کہا گيا ہے کہ ادارے کے ساتھ طے شدہ اہداف کے حصول کو ممکن بنايا جائے گا۔

دہشت گردی کی مالی معاونت کے انسداد کی غرض سے اپنی مالی پاليسياں بين الاقوامی معيارات کے مطابق بنانے کے ليے پاکستان کو اکتوبر تک کی مہلت دی گئی ہے۔ منی لانڈرنگ کے انسداد کے ليے سرگرم واچ ڈاگ فنانشل ايکشن ٹاسک فورس (FATF) نے جمعے کو جاری کردہ بيان ميں اسلام آباد حکومت پر زور ديا ہے کہ وہ طے شدہ منصوبے و معيارات پر عملدرآمد کو حد سے حد اکتوبر تک يقينی بنائے۔ اس بيان کے مطابق پاکستان رواں سال جنوری اور مئی کے ليے طے شدہ اہداف کے حصول ميں ناکام رہا، جس سبب يہ ٹاسک فورس تشويش ميں مبتلا ہے۔

عالمی سطح پر رقوم کی غير قانونی منتقلی روکنے کے ليے فنانشل ايکشن ٹاسک فورس کا قيام تيس برس قبل عمل ميں آيا تھا۔ ٹاسک فورس ميں يورپی کميشن، امريکا اور چين کے علاوہ کئی ديگر ممالک بھی شامل ہيں۔ پاکستان کے حوالے سے يہ تازہ انتباہ امريکی رياست فلوريڈا ميں منعقدہ اجلاس کے بعد جاری کيا گيا۔

ايف اے ٹی ايف نے بيان ميں کہا ہے کہ پاکستان رواں سال اکتوبر تک اپنے طے شدہ ايکشن پلان پر عملدرآمد يقينی بنائے بصورت ديگر ٹاسک فورس کے آئندہ اجلاس ميں يہ فيصلہ کيا جائے گا کہ پاکستان کے خلاف کيا اقدامات کيے جائيں۔ واضح رہے کہ پاکستان کو پہلے ہی 'گرے لسٹ‘ ميں شامل کيا جا چکا ہے۔ اس فہرست ميں ان ملکوں کو شامل کيا جاتا ہے، جہاں منی لانڈرنگ اور دہشت گردی کے مالی معاونت روکنے کے ليے اقدامات ناکافی ہيں۔ بھارت کا کافی عرصے سے مطالبہ ہے کہ پاکستان کو بليک لسٹ کيا جائے۔ ايسا ہونے کی صورت ميں پاکستان کو پابنديوں کا سامنا کرنا پڑ سکتا ہے۔

اس پيش رفت پر ہفتے کے روز رد عمل ظاہر کرتے ہوئے پاکستانی وزارت خزانہ کی جانب سے کہا گيا ہے کہ حکومت طے شدہ ايکشن پلان پر مقررہ وقت کے اندر عملدرآمد يقينی بنانے کے ليے ہر ممکن اقدامات کرنے کے سلسلے ميں پر عزم ہے۔

ع س / ع ا، نيوز ايجنسياں