ٹریفک حادثے میں زخمی افغان کرکٹر انتقال کر گئے | کھیل | DW | 06.10.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اشتہار

کھیل

ٹریفک حادثے میں زخمی افغان کرکٹر انتقال کر گئے

افغان بیٹسمین نجیب ترکئی گزشتہ ہفتے ایک ٹریفک حادثے کا شکار ہوگئے تھے۔ افغان کرکٹ بورڈ کا کہنا ہے کہ نجیب زخموں کی تاب نہ لاتے ہوئے منگل کو انتقال کر گئے۔

انتیس سالہ نجیب گزشتہ جمعے کو جلال آباد میں ایک تیز رفتار گاڑی کی ٹکر سے شدید زخمی ہو گئے تھے۔ افغان کرکٹ بورڈ نے ان کے انتقال پر گہرے رنج و صدمے کا اظہار کیا ہے۔ اے سی بی نے ایک ٹویٹر پیغام  میں کہا، ''کرکٹ بورڈ اور پورا ملک اس دل دہلا دینے والی خبر پر بہت غمزدہ ہے۔ ہمارے لیے اس جارحانہ اوپننگ بیٹسمین اور ایک انتہائی نفیس انسان کی موت ایک بہت بڑا نقصان ہے۔‘‘

نجیب ترکئی نے ایک ون ڈے انٹر نیشنل میچ اور 12 ٹوئنٹی ٹوئنٹی انٹرنیشنل میچ کھیلے تھے۔انہوں نے اپنا واحد ایک روزہ بین الاقوامی میچ بھارت میں آئر لینڈ کے خلاف 2017ء کھیلا تھا۔

وہ گزشتہ چھ برسوں سے ٹی ٹوئنٹی میچز کھیل رہے تھے۔ انہوں نے اپنے ٹی ٹوئنٹی کیریئر کا آغاز 2014ء میں بنگلہ دیش کے خلاف میچ سے کیا تھا۔ نجیب ترکئی نے گزشتہ ماہ شپریزہ کرکٹ لیگ میں اپنا آخری میچ کھیلا تھا، جس میں انہوں نے 32 رنز بنائے تھے۔   

عالمی شہرت یافتہ کرکٹرز راشد خان اور محمد نبی نے ترکئی کی وفات پر تعزیتی پیغام بھیجے ہیں۔

قبل ازیں افغان کرکٹ بورڈ نے بتایا کہ نجیب ترکئی کو گزشتہ جمعے حادثے کے بعد ننگرہار کے ہسپتال میں داخل کرایا گیا تھا اور ان  کی حالت بہت نازک تھی۔

ک م / ش ج ( روئڑز)