نریندر مودی اور نواز شریف کا ٹیلی فون پر رابطہ | حالات حاضرہ | DW | 06.07.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

نریندر مودی اور نواز شریف کا ٹیلی فون پر رابطہ

بھارتی وزیراعظم نریندر مودی نے پاکستان کے وزیراعظم نواز شریف کو فون کر کے عید کی مبارک باد دی ہے۔ انہوں نے نواز شریف کی جلد صحت یابی کے لیے نیک خواہشات کا اظہار بھی کیا۔

بین الاقوامی خبر رساں ایجنسی روئٹرز کی ایک رپورٹ کے مطابق بھارتی وزیر اعظم نریندر مودی کا نواز شریف کو ٹیلی فون کرنا اس بات کا عکاس ہے کہ دونوں ممالک کے مابین تناؤ کے باوجود دونوں رہنما رابطے میں رہتے ہیں۔

واضح رہے کہ مئی میں 66 سالہ نواز شریف کی لندن کے ایک ہسپتال میں اوپن ہارٹ سرجری کی گئی تھی۔ گزشتہ پانچ برسوں میں پاکستانی وزیراعظم کا دل کا یہ دوسرا آپریشن ہے۔

پاکستان کے وزیراعظم ہاؤس کی جانب سے جاری بیان میں کہا گیا ہے، ’’بھارتی وزیراعظم نریندر مودی نے عید کے موقع پر وزیراعظم کو فون کیا اور ان کی خیریت بھی دریافت کی۔‘‘ مئی میں اپنے آپریشن سے قبل نواز شریف نے بھی مودی کو ٹیلی فون کیا تھا۔

بھارت کے دفاعی تجزیہ کار اُدھے بھاسکر نے ایک رپورٹ کے لیے ڈی ڈبلیو سے خصوصی گفتگو میں کہا تھا کہ بھارت میں اب بھی یہ تاثرعام ہے کہ پاکستان کی اسٹیبلشمنٹ اب بھی بھارت کے ساتھ بہتر تعلقات نہیں چاہتی اور دونوں ممالک کے تعلقات کی بحالی کے لیے اس بد اعتمادی کو دور کرنا ضروری ہے۔

نواز شریف پاکستان کے روایتی حریف بھارت کے ساتھ تعلقات بہتر کرنے کے خواہاں ہیں۔ بھارت سے تعلقات کو بہتر بنانا سن 2013 میں ان کی انتخابی مہم کا بھی حصہ تھا۔ لیکن پاکستان اور بھارت کے مابین سفارتی تعلقات بھارت میں شدت پسندوں کی جانب سے کیے گئے حملوں اور سرحد پر کشیدگی کے باعث سرد مہری کا شکار ہیں۔

DW.COM

اشتہار