فرائی بُرگ، ماحول دوست شہر | معلوماتِ جرمنی | DW | 22.05.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

معلوماتِ جرمنی

فرائی بُرگ، ماحول دوست شہر

چینی دارالحکومت بیجنگ اور فرائی برگ میں ایک قدر مشترک ہے کہ دونوں شہروں میں سائیکل سواروں کی تعداد کاروں کے مقابلے میں دوگنی ہے۔

چینی دارالحکومت میں سائیکل کے زیادہ استعمال کی وجہ اس کا ایک سستی سواری ہونا ہے جبکہ فرائی بُرگ میں سائیکل کا زیادہ استعمال لوگوں میں تحفظ ماحولیات کا زندہ جذبہ ہے۔ یہاں کا ذرائع ابلاغ لوگوں میں تحفظ ماحولیات کے بارے میں آگہی کے لئے بھرپورکردار ادا کررہا ہے۔ جرمنی کے جنوب میں واقع یہ چھوٹا شہر ’ماحول کے تحفظ‘ کے حوالے سے اپنی الگ پہچان رکھتا ہے۔

جرمنی کا ماحولیاتی دارالحکومت

کار رکھنے والوں کے لئے اس شہر میں گزارہ آسان نہیں کیونکہ اندرون شہر کار پارکنگ کی جگہیں بہت کم ہیں۔ البتہ سائیکل کے سٹینڈ جگہ جگہ قائم کئے گئے ہیں۔ خاص کر یونیورسٹی کے مرکزی حصے میں بیک وقت ہزاروں سائیکلیں کھڑی نظر آتی ہیں۔ ایک اندازے کے مطابق پورے شہر میں سائیکل سواری کے لئے چار سو کلومیٹر لمبے راستے بنائے گئے ہیں۔

Flash-Galerie Deutschland China Expo 2010 in Schanghai Freiburg Pavillion

اپنی مدد آپ کے تحت توانائی کے حصول کی نمایاں کوششیں

بہت زیادہ سائیکل سواری کے باعث شہر میں کہیں کہیں ٹریفک جام کے مناظر بھی دکھائی دیتے ہیں۔ سب سے زیادہ سائیکل سواروں کا ہجوم یونیورسٹی سے کچھ فاصلے پر واقع نیلے پُل(Blaue Brücke) پر نظر آتا ہے۔ یہ پُل یونیورسٹی  پہنچنے کے لئے ریل کی پٹری عبور کرنے کا واحد ذریعہ ہے۔ تقریبا دس ہزار سائیکل سوار روزانہ اسے عبور کرتے ہیں۔

پانی میں پاؤں

شہر کے مرکز میں سائیکل سواری پر پابندی ہے اور ویسے بھی پتلے راستے اور چکردار  چوراہوں پر پیدل چلنا زیادہ مناسب ہے۔ بیچلے نامی قدیم نہر، جس کی چوڑائی چند فٹ اور گہرائی پانچ انچ ہے، اپنی طرز کی انوکھی نہر ہے۔ اس کا حجم بہت کم ہے اوراکثر بے خیالی میں اٹھایا ہوا قدم سیدھا اس نہر میں جا پڑتا ہے۔ اس حوالے سے ایک مقامی کہاوت مشہور ہے کہ جب کسی کا پاؤں اس نہر میں پڑتا ہے تو اس کا مطلب ہے کہ جلد ہی اس کی شادی اس شہر کے کسی باشندے سے ہونے والی ہے۔

جرمنی میں تحفظ ماحولیات کی علامت

فرائیبُرگ میں سائیکل سواری تحفظ ماحولیات کےسلسلے میں اٹھائے جانے والے اقدامات کا بنیادی حصہ ہے۔ اس کے علاوہ بھی یہاں ماحول کے تحفظ کے لئےبہت کچھ کیاجارہا ہے۔ جرمنی میں ماحولیاتی تحفظ کےسب سے زیادہ ادارے اسی شہر میں ہیں۔ اپلائیڈ ایکولوجی(The Institute for Applied Ecology) کا مرکز اور یورپی بیورو کے بین الاقوامی کونسل کے ادارے (ICLEI) کے دفاتر یہاں قائم ہیں۔ جرمنی کے معروف تحقیقاتی ادارے فراؤن ہوفر کی شمسی توانائی پر تحقیق کا مرکز(ISE) اور بین الاقوامی شمسی توانائی سوسائٹی (ISES) کے ادارے بھی یہاں ہیں۔

Ein Gässle in Freiburg

شہر کی اندرونی گلیوں کا ایک منظر

اس میں کوئی شک نہیں کہ شمسی توانائی اس شہر کی توانائی کی ضرورت پوری  کرنے کا اہم ذریعہ ہے۔ جغرافیائی طور پر یہ جرمنی کے سب سے روشن حصے میں واقع ہے۔ یہ شہر جرمنی کے ماحولیاتی تحفظ کےدارالحکومت کے علاوہ شمسی توانائی پیدا کرنے والے شہر کے طور پر بھی جانا جاتا ہے۔ ایک اندازے کے مطابق یہاں گھروں کی چھتوں پر شمسی توانائی پیدا کرنےوالےتقریباﹰ دو ہزار میٹر سکوائر سولر سیلز(solar cells) لگے ہوئے ہیں۔ یہاں کے مرکزی کھیل کے سٹیڈیم میں لگی مصنوعی روشنیاں شمسی توانا ئی کے ذریعے روشن کی جاتی ہیں۔

شمسی توانائی کے حصول کے لئے جس رفتار سےیہاں تحقیق ہورہی ہے اس سے ایسا لگتا ہے کہ وہ وقت دور نہیں جب  بچے شمسی توانائی سے چلنے والی سائیکلوں پر سکول جایا کریں گے۔

DW.COM

ویب لنکس