بھارت کے زیر انتظام کشمیر کی انتظامیہ نے سکیورٹی فورسز پر پتھراؤں کرنے والے مبینہ کشمیریوں کو ملازمت اور پاسپورٹ کے لیے سکیورٹی کلیئرنس نہ دینے کا فیصلہ کیا ہے۔ کشمیری نوجوانوں کو ملازمت اور پاسپورٹ کے لیے پولیس کی جانب سے مثبت رپورٹ حاصل کرنا ہو گی۔ بھارت نواز کشمیری رہنماؤں نے بھی اس فیصلے پر سخت نکتہ چینی کی ہے۔ کشمیر میں بھارت مخالف مظاہروں کے دوران فورسز پر پتھراؤ ایک عام سی بات ہے اور مبصرین کے مطابق حکومت اس پر کنٹرول کے لیے اس طرح کی سختیاں برت رہی ہے۔

ڈیرہ اسماعیل خان میں پولیو کی ایک ٹیم پر حملے کے نتیجے میں ایک پولیس اہلکار ہلاک ہو گیا ہے۔ متاثرہ پولیس اہلکار پولیو کے قطرے پلانے والی ٹیم کی حفاظت پر مامور تھا۔ گزشتہ دو روز میں پولیو ورکرز کے حفاظتی اہلکاروں پر یہ تیسرا حملہ ہے۔ گزشتہ ہفتے ہی عمران خان حکومت نے انسداد پولیو مہم کا آغاز کیا تھا۔ پاکستان اور افغانستان دنیا کے وہ دو ممالک ہیں، جہاں پولیو کا مرض اب بھی پایا جاتا ہے۔ تاہم رواں برس پاکستان میں ابھی تک پولیو کا صرف ایک کیس سامنے آیا ہے جبکہ گزشتہ برس اسی عرصے کے دوران یہ تعداد چھیاسٹھ تھی۔

ستان میں بڑھتے ہوئے تشدد کے باعث امریکا نے مزید ہزاروں افغانوں کو سیاسی پناہ دینے کا اعلان کیا ہے۔ اس سے پہلے بھی امریکا نے ان پچیس سو افغانوں کو امریکا لانے کا اعلان کیا تھا، جو امریکی افواج کے ساتھ مل کر کام کرتے رہے ہیں۔ ان کے علاوہ بھی چار ہزار افغان اور ان کے اہلخانہ سکیورٹی کلیئرنس کے منتظر ہیں اور انہوں نے امریکی ویزوں کے لیے درخواستیں دے رکھی ہیں۔ مجموعی طور پر بیس ہزار افغانوں نے بیرون ملک جانے کے لیے دلچسپی کا اظہار کر رکھا ہے۔

بحیرہ روم کے متعدد سیاحتی مقامات پر جنگلاتی آگ پھیلتی جا رہی ہے۔ اتوار کو مزید کئی مقامات پر آگ بھڑک اٹھنے کی اطلاعات ہیں۔ جنوبی ترکی میں درجنوں ہوٹلوں اور دیہات کو ایک بار پھر خالی کرا لیا گیا ہے۔ سب سے زیادہ تباہ کن صورتحال کا سامنا ترکی کو ہے، جہاں اب تک کم از کم آٹھ افراد ہلاک ہو چکے ہیں۔ دوسری جانب اٹلی نے سینکڑوں مقامات پر آگ لگنے کی اطلاع دی ہے، جن میں سے دو پچاس جزیرے سسلی کے مقامات شامل ہیں۔ اسی طرح یونان کے متاثرہ علاقوں سے بھی مقامی رہائشیوں اور سیاحوں کو نکال لیا گیا ہے۔

بحر ہند میں ایک آئل ٹینکر پر مبینہ ڈرون حملے کے بعد اسرائیل اور ایران کے درمیان تنازعہ بڑھتا جا رہا ہے۔ تہران حکومت نے اس اسرائیلی الزام کو مسترد کر دیا ہے کہ اس حملے کے پیچھے ایرانی فورسز کا ہاتھ ہے۔ دوسری جانب برطانوی اور امریکی محکمہ خارجہ کو بھی شک ہے کہ اس حملے کے پیچھے ایران کا ہاتھ ہے۔ ایک اسرائیلی کمپنی کے آئی ٹینکر پر جمعرات کو عمان کے ساحل پر حملہ ہوا تھا، جس کے نتیجے میں عملے کے دو رکن مارے گئے تھے۔ ایک کا تعلق رومانیہ جبکہ دوسرے کا برطانیہ سے تھا۔

حکومتی اطلاعات کے مطابق جنوب مغربی نائجر میں ایک حملے کے نتیجے میں کم از کم پندرہ فوجی ہلاک ہو گئے ہیں جبکہ چھ اہلکار لاپتا ہیں۔ تورودی ضلع میں ان فوجیوں پر گھات لگا کر حملہ کیا گیا۔ یہ علاقہ برکینا فاسو اور مالی کی سرحدوں سے متصل ہے۔ اس سرحدی مثلث میں اکثر پرتشدد کارروائیاں ہوتی رہتی ہیں۔ نائجر حکام نے اس حملے کی ذمہ داری جہادی گروپوں پر عائد کی ہے لیکن فی الحال اس دعوے کی تصدیق نہیں ہو پائی ہے۔

لبنانی دارالحکومت بیروت کے جنوب میں واقع شہر خلدہ میں نامعلوم مسلح حملہ آوروں نے پانچ شعیہ افراد کو گولیاں مار کر ہلاک کر دیا ہے۔ متاثرہ افراد میں سے تین کا تعلق حزب اللہ ملیشیا سے تھا۔ یہ واقعہ اس وقت پیش آیا جب یہ افراد ہفتے کو قتل ہونے والے حزب اللہ کے ایک دوسرے رکن کے گھر افسوس کے لیے جا رہے تھے۔ خلدہ شہر میں شیعہ اور سنیوں کے مابین فرقہ وارانہ کشیدگی میں اضافہ ہوتا جا رہا ہے۔ قبل ازیں اسی علاقے میں کچھ سنیوں کو ہلاک کر دیا گیا تھا۔

جرمنی نے پیر سے اپنے انڈو پیسیفک مشن کا آغاز کر دیا ہے۔ جنگی بحری جہاز کی آج روانگی کی تقریب میں جرمن وزیر دفاع آنے گریٹ کرامپ کارن باور بھی شریک ہوں گی۔ یہ جنگی بحری جہاز آئندہ چھ ماہ تک ہارن آف افریقہ سے سنگاپور اور جنوبی کوریا سے آسٹریلیا تک کے پانیوں میں گشت کرے گا۔ جرمن حکومت اس مشن کے ساتھ اپنے انڈوپیسیفک اتحادیوں کا ساتھ دینا چاہتی ہے۔ امریکا اور اس کے مغربی اتحادیوں کا الزام ہے کہ بیجنگ حکومت خاص طور پر بحیرہ جنوبی چین میں عدم استحکام پیدا کر رہی ہے۔ تاہم چین ان خدشات کو رد کرتا ہے۔ امریکا چین کی فوجی طاقت کی وسعت کو روکنے کی کوشش میں ہے۔

تین نجی سمندری امدادی تنظیموں کے عملے نے اتوار کو وسطی بحیرہ روم میں سینکڑوں تارکین وطن کو ڈوبنے سے بچا لیا ہے۔ پانچ گھنٹے کے اس ریسکیو مشن میں اوشن وائکنگ، ایس او ایس بحیرہ روم اور سی واچ تھری نامی تنظیمیں شریک تھیں۔ مجموعی طور پر چار سو تارکین وطن کو بچایا گیا ہے۔ ایس او ایس بحیرہ روم نے تیونس کے پانیوں میں درجنوں مہاجرین کو بچایا۔ اس علاقے میں چند روز پہلے بھی درجنوں افراد کو بچایا گیا تھا۔ یورپ پہنچنے کی خواہش میں سالانہ سینکڑوں افراد بحیرہ روم کے پانیوں میں ڈوب کر ہلاک ہو جاتے ہیں۔