ضلع خیبر میں خواتین پولیس افسران کی مخالفت کیوں؟

خیبر پختونخوا کی صوبائی حکومت نے ضلع خیبر میں خواتین کو برابری کی بنیاد پر حقوق دینے اور انہیں فوری انصاف تک رسائی فراہم کرنے کے لیے چار پولیس اہلکاروں کو اسٹیشن ہاؤس آفیسرز اور لائن آفیسرز تعینات کیا ہے۔ اسی سلسلے میں ضلع خیبر کی افغان سرحد سے متصل تحصیل لنڈی کوتل میں کرسچین کمیونٹی سے تعلق رکھنے والی مہک پرویز مسیح کو ایڈیشنل اسٹیشن ہاؤس آفیسر تعینات کیا گیا ہے۔

دیگر تین خواتین پولیس افسران کو باڑہ، جمرود اور علی مسجد کے علاقوں میں تعینات کیا گیا ہے۔ ضلع خیبر کے تعلیم یافتہ افراد اس اقدام کو خوش آئند قرار دیے رہے ہیں۔ تاہم بعض قبائلی عمائدین اسے اپنے روایات کے منافی قرار دیتے ہوئے اس کی مخالفت کر رہے ہیں۔ دوسری جانب پولیس کے اعلیٰ افسران پُر اُمید ہیں کہ ان خواتین کی موجودگی کی وجہ سے قبائلی خواتین کھل کر اپنے مسائل خواتین آفیسرز کو بتا سکیں گی۔

ڈی ڈبلیو نے خیبر ایجنسی کےعبدالاعظم شنواری سے بات کی تو ان کا کہنا تھا، ''سابق قبائلی ملک اور مشیران سمیت ایک بڑی تعداد میں مقامی لوگ اس فیصلے سے ناخوش ہیں۔ تاہم بعض تعلیم یافتہ نوجوانوں اسے تبدیلی کا آغاز قرار دے رہے ہیں۔‘‘

 ان کا مزید کہنا تھا کہ علاقے میں عائلی مسائل ہوتے ہیں جبکہ جائیداد کی تقسیم کا مسئلہ سرفہرست ہے، ''ایسے میں جب خواتین شکایت کے لیے پولیس کے پاس جائیں گی تو ساتھ ہی عدالتوں کے چکر بھی کاٹنے پڑیں گے۔ خواتین کو جیل اور حوالات جانا پڑے گا اور بعض کیسز میں انہیں ہھتکڑیوں میں عدالتوں میں پیش کیا جائے گا، جو قبائلی روایات کے خلاف ہے۔‘‘

کے پی کے ماڈل پولیس اسٹیشن، عورتوں کے لیے خواتین پولیس عملہ

لیکن پولیس کے اعلیٰ افسران پُر اُمید ہیں کہ اس سے خواتین کے مسائل کم ہوں گے اور ان میں اپنے حق کے لیےآواز اٹھانے کا حوصلہ بڑھے گا۔ ضلع خیبر کے ضلعی پولیس آفیسر سلیم عباس کلاچوی کا کہنا تھا، ''قبائلی خواتین کو اب ان کے علاقے میں تعینات خواتین پولیس افسران سے رابطہ کرنے میں آسانی ہو گی۔ یہ خواتین محکمہ پولیس میں خدمات انجام دے چکی ہیں اور ہم پُر اُمید ہیں کہ اس اقدام سے قبائلی ضلع خیبر میں خواتین سے متعلق مسائل کے حل میں مدد ملے گی۔‘‘

سابق قبائلی عمائدین کی مخالف

ضلع خیبر کے سابق ملک اور عمائدین نے وزیر اعلیٰ خیبر پختونخوا اور انسپکٹر جنرل پولیس سے مطالبہ کیا ہے کہ مذکورہ اقدام قبائلی رسم و رواج اور روایات کے خلاف ہے، لہٰذا یہ فیصلہ واپس لیا جائے۔ ان قبائلی عمائدین نے دھمکی دی ہے کہ اگر حکومت نے یہ فیصلہ واپس نہ لیا تو وہ احتجاج کی کال دیں گے۔     

 دوسری جانب قبائلی خواتین نے حکومت کے اس فیصلے کو نئی نسل کے لیے خوش آئند قرار دیا ہے۔ ڈوئچے ویلے نے خواتین کے حقوق کے لیے سرگرم ناہید آفریدی سے بات کی تو ان کا کہنا تھا، '' جس طرح ہم خواتین ڈاکٹرز اور دیگر شعبوں میں خواتین کو لانے کا مطالبہ کرتے ہیں، اسی طرح ہر شعبے میں خواتین کو آگے آنے کا موقع دیا جائے۔ ایسی خواتین معاشرے کے لیے رول ماڈل ہیں اور ہمیں ان کی حوصلہ افزائی کرنا چاہیے۔‘‘

اس سے قبل بعض دیگر سابق قبائلی اضلاع میں خواتین پولیس اہلکار کام کر چکی ہیں۔ انضمام کے بعد ضلع کرم میں پہلی بار سمرن عامرکو ایڈیشنل اسٹیشن ہاؤس آفیسر تعینات کیا گیا تھا۔ اسی ضلع میں صوفیہ مسیح کو خواتین ڈیسک کی انچارج بنایا گیا تھا۔ جب اس سلسلے میں ڈوئچے ویلے نے پشاور پولیس کے سربراہ (کیپیٹل سٹی پولیس چیف) قاسم علی خان سے بات کی تو ان کا کہنا تھا، ''ان علاقوں میں لیڈی پولیس کا ہونا ضروری تھا، خواتین کو اس لیے تعینات کیا گیا ہے کہ مقامی خواتین کھل کر اپنے مسائل بتا سکیں۔‘‘

 ان کا مزید کہنا تھا کہ اس سے قبل دیگر اضلاع میں تین خواتین کو بحثیت سب انسپکٹرز اور ایڈیشنل اسٹیشن ہاؤس آفیسرز تعینات کیا جا چکا ہے۔