جرمن سیاسی جماعتیں ملک سے جوہری ہتھیار ہٹانے کی خواہاں | حالات حاضرہ | DW | 16.11.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

حالات حاضرہ

جرمن سیاسی جماعتیں ملک سے جوہری ہتھیار ہٹانے کی خواہاں

جرمنی میں مخلوط حکومت کے قیام کے لیے جاری مذاکرات میں شریک جماعتیں چاہتی ہیں کہ جرمنی میں نصب تمام جوہری ہتیھاروں کو ہٹا دیا جائے۔ خبر رساں ادارے روئٹرز نے یہ بات ایک دستاویز کے حوالے سے بتائی ہے۔

روئٹرز کے مطابق دفاع اور خارجہ پالیسی پر بحث سے متعلق اس دستاویز میں اس حوالے سے امریکا کا نام نہیں لیا گیا جس کے بارے میں خیال کیا جاتا ہے کہ جرمنی کے ایک مغربی شہر بوئشیل میں واقع ایک فوجی اڈے پر اس کے 20 جوہری ہتھیار موجود ہیں۔ تاہم یہ غیر سرکاری اندازے ہیں۔

جرمن چانسلر انگیلا میرکل چوتھی مدت کے لیے حکومت سازی کی کوششوں میں مصروف ہیں۔ تاہم اس بار اتحادی حکومت کے قیام کے لیے انہیں ماحول دوست گرین پارٹی اور کاروبار دوست فری ڈیموکریٹک پارٹی کے ساتھ معاملات طے کرنا پڑ رہے ہیں۔ میرکل کی سابق اتحادی حکومت کی بڑی پارٹنر جماعت سوشل ڈیموکریٹک پارٹی SPD نے رواں برس ستمبر میں ہونے والے پارلیمانی انتخابات کے بعد میرکل کی قدامت پسند جماعت سی ڈی یو کے ساتھ اتحاد نہ کرنے کا فیصلہ کیا تھا۔

مغربی دفاعی اتحاد نیٹو میں شامل ملک جرمنی جوہری طاقت نہیں ہے۔ میرکل کی سربراہی میں ہی قائم حکومت نے 2011ء میں ملک میں قائم جوہری پاور پلانٹس کو 2022ء تک بند کرنے کا اعلان کیا تھا۔ جرمن حکومت کی طرف سے یہ فیصلہ جاپان میں فوکوشیما جوہری پلانٹ کو پیش آنے والے حادثے کے بعد کیا گیا تھا۔

Atomtest auf dem Mururoa-Atoll

مغربی دفاعی اتحاد نیٹو میں شامل ملک جرمنی جوہری طاقت نہیں ہے

روئٹرز کے مطابق اتحادی حکومت کی تین متوقع جماعتوں نے اس دستاویز میں لکھا ہے، ’’نیٹو کے اندر، ہم چاہتے ہیں کہ جرمنی میں نصب باقی ماندہ جوہری ہتھیاروں کو بھی یہاں سے ہٹایا جائے اور ہم ان ہتھیاروں کو جدید بنانے کے پروگرام کا بھی خاتمہ چاہتے ہیں۔‘‘

صدارتی مدت مکمل ہونے سے قبل سابق امریکی صدر باراک اوباما نے جوہری ہتھیاروں، ان کے ڈلیوری سسٹم اور لیبارٹریوں کو جدید بنانے کے منصوبے کا اعلان کیا تھا۔ ان کے پس رو ڈونلڈ ٹرمپ نے بھی کہا ہے کہ وہ ملک کی جوہری صلاحیت کو پھیلانے اور زیادہ مضبوط کرنے کا ارادہ رکھتے ہیں۔

روئٹرز کے مطابق میرکل کی جماعت سی ڈی یو، گرین پارٹی اور ایف ڈی پی متوقع طور پر ابتدائی بحث ومباحثہ آج جمعرات 16 نومبر کو مکمل کر لیں گی۔ جس کے بعد حکومت سازی کے لیے باقاعدہ مذاکرات کا آغاز ہو گا۔