جرمنی: پولیس کی گاڑی حادثے کا شکار، چھ افراد زخمی

مشرقی جرمنی کے شہر ہالے میں پولیس کے مطابق دو گاڑیوں کے مابین تصادم کے نتیجے میں  چھ افراد زخمی ہو گئے۔ پولیس کے ایک ترجمان نے بتایا کہ حادثے کا شکار ہونے والی ایک گاڑی پولیس کی تھی جبکہ زخمی ہونے والوں میں ایک اٹھارہ سالہ راہگیر کو شدید چوٹیں لگی ہیں۔

 ترجمان نے بتایا کہ جمعہ کی شام ایک جنکشن پر نگرانی کے لیے گشت کرنے والی پولیس کار کے دوسری کار سے ٹکرانے کے بعد دو افراد کو ہسپتال میں داخل کرایا گیا۔

حادثے کے نتیجے میں پولیس کی گاڑی سڑک سے اترنے کے بعد ٹریفک لائٹ کھلنے کے انتظار میں کھڑے پیدل چلنے والے افراد سے ٹکرا گئی۔ اس دوران ایک نوجوان گاڑی اور ٹریفک لائٹ کے کھمبے کے درمیان پھنس گیا اور اسے شدید چوٹیں آئیں۔

دوسری کار مخالف لین میں آئی اور تیسری گاڑی سے ٹکرا گئی۔ اڑتے ملبے سے ایک اور راہگیر بھی زخمی ہو گیا۔ پولیس کی گاڑی میں سوار تین اہلکار اور دوسری کار کا ڈرائیور بھی زخمی ہوا۔ ترجمان کے مطابق آیا حادثے کے وقت پولیس کی گاڑی  اپنی مخصوص نیلی روشنی اور سائرن کے ساتھ سفر کر رہی تھی یا نہیں، اس بارے میں تفتیش جاری ہے۔

ش ر⁄ ع ت  (ڈی پی اے)