بھارتی زیر انتظام کشمیر میں علاقائی انتخابات کا دوسرا مرحلہ

بھارتی زیر انتظام کشمیر  کے چھ اضلاع میں تقریباﹰ 26 لاکھ شہری ووٹ دینے کے اہل ہیں، جو آج بدھ 25 ستمبر کو ہونے والے انتخابات کے دوسرے مرحلے میں 26 نمائندوں کو منتخب کریں گے جس کے لیے 239 امیدوار میدان میں ہیں۔ انہی میں ریاست کا سب بڑا اور مرکزی شہر سری نگر بھی شامل ہیں جہاں کچھ پولنگ اسٹیشنوں پر رائے دہندگان صبح سویرے قطاروں میں کھڑے تھے۔ علاقے کے چیف الیکٹورل آفیسر کی طرف سے خبر رساں ادارے اے پی کو بتایا گیا کہ مقامی وقت کے مطابق صبح 11 بجے تک 24 فیصد سے زیادہ ووٹ ڈالے جا چکے تھے۔

بی جے پی کشمیر کی ریاستی حثیت بحال کرے گی، بھارتی وزیر اعظم

جموں کشمیر کے انتخابات میں ماحولیاتی بحران نظر انداز کیوں؟

ایک دہائی میں یہ اس طرح کے پہلے انتخابات ہیں اور بھارتی وزیر اعظم نریندر مودی کی ہندو قوم پرست حکومت کی جانب سے 2019 میں اس مسلم اکثریتی خطے کی نیم خودمختاری ختم کرنے کے بعد یہ پہلے انتخابات ہیں۔ سابقہ ریاست کو دو وفاق کے زیر انتظام علاقوں، لداخ اور جموں و کشمیر میں تقسیم کر دیا گیا تھا۔

اس کے بعد سے یہ یہاں شہری آزادیاں اور میڈیا کی آزادیاں قدغنوں کی زد میں ہیں۔

گزشتہ تین دہائیوں کے دوران یہ پہلے انتخابات ہیں جس میں علیحدگی پسندوں کی جانب سے بائیکاٹ کی کال نہیں دی گئی ہے۔

ماضی میں کشمیر میں ہونے والے انتخابات اکثر تشدد، بائیکاٹ اور ووٹوں میں دھاندلی کے الزامات کی زد میں رہے۔

مقامی حکومتوں کے انتخابات کا پہلا مرحلہ 18 ستمبر کو منعقد ہوا تھا جبکہ اس کا تیسرا مرحلہ یکم اکتوبر کو منعقد ہو گا جس کے بعد آٹھ اکتوبر کو ووٹوں کی گنتی کی جائے اور اسی روز نتیجہ بھی متوقع ہے۔

کشمیر 1947 میں برطانوی راج سے آزادی کے بعد وجود میں آنے والی دو ریاستوں ہندوستان اور پاکستان کے درمیان تنازعات کا مرکز رہا ہے۔ کشمیر کے کچھ حصوں کا انتظام ان دونوں ممالک کے پاس ہے لیکن دونوں ہی پورے کشمیر کی ملکیت کے دعوے دار ہیں۔

خیال رہے کہ بھارتی زیر انتظام کشمیر میں علیحدگی پسند 1989 سے نئی دہلی کی حکمرانی کے خلاف لڑ رہے ہیں، جس میں ہزارہا لوگ مارے جا چکے ہیں۔ بعض کشمیری تنظیمیں اس خطے کے پاکستان کے ساتھ انضمام یا الگ ریاست بنانے کے حامی ہیں۔

بھارت کا اصرار ہے کہ پاکستان کشمیر میں ہونے والی عسکریت پسندی کی سرپرستی کر رہا ہے جبکہ پاکستان ان الزامات سے انکار کرتا ہے۔

ا ب ا/ا ا (اے پی، اے ایف پی)