برازیل: مسافر طیارے کے حادثے میں 61 افراد کی ہلاکت پر سوگ

برازیل میں ایک علاقائی ائیرلائن کے مسافر طیارے کو پیش آنے والے حادثے میں اکسٹھ افراد کی ہلاکت کے بعد ملک میں قومی سطح پر تین روزہ سوگ منایا جا رہے۔

ویپاس ایئرلائن نے تصدیق کی ہے  کہ جمعے کے روز برازیل کی ریاست ساؤ پاؤلو میں واقع ونہیڈو مونسیپلٹی میں گر کر تباہ ہونے والے اس کے مسافر طیارے میں سوار تمام 61 افراد ہلاک ہو گئے ہیں۔

برازیل کی اس علاقائی ایئرلائن کی جانب سے جاری کردہ بیان میں کہا گیا ہے، ''ہمیں یہ بتاتے ہوئے افسوس ہو رہا ہے کہ فلائٹ 2283 میں سوار تمام 61 افراد ہلاک ہو گئے ہیں۔‘‘ بیان کے مطابق ان 61 افراد میں سے 57 مسافر اور چار ایئرلائن کے عملے کے اہلکار تھے۔

ایئرلائن کے بیان میں مزید کہا گیا، ''اس وقت ویپاس کی ترجیح مرنے والوں کے لواحقین کو غیر محدود مدد کی فراہمی اور حادثے کی وجہ کا تعین کرنے کے لیے حکام کے ساتھ موثر طریقے سے تعاون کرنا ہے۔‘‘

جہاز کے گر کر تباہ ہونے کے بعد ویپاس نے سوشل میڈیا پلیٹ فارم انسٹاگرام پر ایک علحیدہ بیان میں کہا تھا کہ ابھی تک اس بات کی تصدیق نہیں ہو سکی ہے کہ یہ حادثہ کیسے پیش آیا۔

ویپاس کے مطابق تباہ ہونے والا جہاز دو انجنوں والا ٹربو پوپ تھا اور اس کی پرواز کے وقت ''اس کے تمام سسٹم مکمل طور پر فعال بھی تھے۔‘‘

برازیلین ٹی چینل گلوبو نیوز پر نشر کی گئی فوٹیج میں حادثے کے بعد ایک بڑے علاقے میں آگ کے شعلے اور دھواں بلند ہوتے بھی دیکھا گیا، جو بظاہر جہاز کے ملبے سے اٹھ رہا تھا۔

فرانسیسی اطالوی طیارہ ساز کمپنی اے ٹی آر نے واقعے کی تحقیقات میں مدد کی فراہمی کا اعلان کیا ہے۔ برازیل کے صدر لوئز اناسیو لولا ڈی سلوا نے مسافر طیارے میں سوار تمام افراد کی ہلاکت کی تصدیق کے بعد ملک بھر میں تین روزہ سوگ منانے کا اعلان کیا ہے۔

م ا ⁄ ش ر (اے پی، روئٹرز، اے ایف پی، لوسا، ڈی پی اے)