فرانسیسی صدر ایمانوئل ماکروں نے گلف ممالک کے اپنے دورے کے دوران دوحہ میں اس بات کا انکشاف کیا ہے کہ افغانستان میں مشترکہ یورپی سفارتی مشن تشکیل دینے کی کوشش کی جا رہی ہے۔ اس موقع پر انہوں نے افغانستان سے غیر ملکیوں اور افغان شہریوں کے انخلا میں قطر کے کردار کو سراہا بھی۔
ہفتے کے دن ماکروں نے دوحہ میں صحافیوں سے گفتگو میں کہا کہ کوشش ہے کہ افغانستان میں یورپ کا ایک مشترکہ مشن کام کرنا شروع کر دے تاکہ یورپی سفارت کار ایک مرتبہ پھرافغانستان جا کر اپنی ذمہ داریاں نبھا سکیں۔ انہوں نے مزید کہا کہ البتہ یورپی ممالک کے اس قدم سے یہ مراد نہیں کہ طالبان کی حکومت تسلیم کیا جا رہا ہے۔
اس موقع پر ماکروں نے افغانستان میں بیس سالہ غیر ملکی فوجی مشن کے خاتمے کی خاطر قطر کے سفارتی کردار کو سراہا اور کہا کہ مشکل وقت میں افغانستان سے غیر ملکی باشندوں اور ایسے افغانوں کے انخلا کے سلسلے میں بھی قطر نے بھرپور تعاون کیا، جنہیں طالبان سے انتقام لینے کا خطرہ تھا۔
فرانسیسی صدر ماکروں نے کہا،''میں قطر کے کردار کا شکریہ ادا کرتا ہوں۔'' انہوں نے مزید کہا کہ جس طرح افغانستان کے بحران شروع ہونے کے فوری بعد دوحہ حکومت نے تعاون کیا، اس سے انخلا کا عمل آسان ہو گیا۔ فرانس نے ڈھائی سو سے زائد ایسے افغانوں کو فرانس بلوایا، جو افغانستان کی بیس سالہ جنگ کے دوران کسی نہ کسی طرح وہاں تعینات فرانسیسی فوج یا سفارتی عملے کے ساتھ وابستہ رہے تھے۔
-
قطر میں ایسا خاص کیا ہے؟
تیل اور گیس
قطر دنیا میں سب سے زیادہ ’مائع قدرتی گیس‘ پیدا کرنے والا ملک ہے اور دنیا میں قدرتی گیس کے تیسرے بڑے ذخائر کا مالک ہے۔ یہ خلیجی ریاست تیل اور گیس کی دولت سے مالا مال ہے۔
-
قطر میں ایسا خاص کیا ہے؟
بڑی بین الاقوامی کمپنیوں میں حصہ داری
یہ ملک جرمن کار ساز ادارے فوکس ویگن کمپنی کے 17 فیصد اور نیو یارک کی امپائراسٹیٹ بلڈنگ کے دس فیصد حصص کا مالک ہے۔ قطر نے گزشتہ چند برسوں میں برطانیہ میں 40 ارب پاؤنڈز کی سرمایہ کاری کی ہے جس میں برطانیہ کے نامور اسٹورز ’ہیروڈز‘ اور ’سینز بری‘کی خریداری بھی شامل ہے
-
قطر میں ایسا خاص کیا ہے؟
ثالث کا کردار
قطر نے سوڈان حکومت اور دارفور قبائل کے درمیان کئی دہائیوں سے جاری کشیدگی ختم کرانے میں ثالث کا کردار ادا کیا تھا۔ اس کے علاوہ فلسطینی دھڑوں الفتح اور حماس کے درمیان مفاہمت اور افغان طالبان سے امن مذاکرات کے قیام میں بھی قطر کا کردار اہم رہا ہے۔
-
قطر میں ایسا خاص کیا ہے؟
الجزیرہ نیٹ ورک
دوحہ حکومت نے سن انیس سو چھیانوے میں ’الجزیرہ‘ کے نام سے ایک ٹیلی ویژن نیٹ ورک بنایا جس نے عرب دنیا میں خبروں کی کوریج اور نشریات کے انداز کو بدل کر رکھ دیا۔ آج الجزیرہ نیٹ ورک نہ صرف عرب خطے میں بلکہ دنیا بھر میں اپنی ساکھ بنا چکا ہے۔
-
قطر میں ایسا خاص کیا ہے؟
قطر ایئر لائن
قطر کی سرکاری ایئر لائن ’قطر ایئر ویز‘ دنیا کی بہترین ایئر لائنز میں شمار ہوتی ہے۔ اس کے پاس 192 طیارے ہیں اور یہ دنیا کے ایک سو اکیاون شہروں میں فعال ہے۔
-
قطر میں ایسا خاص کیا ہے؟
فٹ بال ورلڈ کپ
سن 2022 میں فٹ بال ورلڈ کپ کے مقابلے قطر میں منعقد کیے جائیں گے۔ یہ عرب دنیا کا پہلا ملک ہے جو فٹ بال کے عالمی کپ کی میزبانی کر رہا ہے۔ یہ خلیجی ریاست فٹ بال کپ کے موقع پر بنیادی ڈھانے کی تعمیر پر 177.9 ارب یورو کی سرمایہ کاری کر رہی ہے۔
-
قطر میں ایسا خاص کیا ہے؟
قطر کی آبادی
قطر کی کُل آبادی چوبیس لاکھ ہے جس میں سے نوے فیصد آبادی غیرملکیوں پر مشتمل ہے۔ تیل جیسے قدرتی وسائل سے مالا مال خلیجی ریاست قطر میں سالانہ فی کس آمدنی لگ بھگ ایک لاکھ تئیس ہزار یورو ہے۔
-
قطر میں ایسا خاص کیا ہے؟
برطانیہ کے زیر انتظام
اس ملک کے انتظامی امور سن 1971 تک برطانیہ کے ماتحت رہے۔ برطانیہ کے زیر انتظام رہنے کی کُل مدت 55 برس تھی۔ تاہم سن 1971 میں قطر نے متحدہ عرب امارات کا حصہ بننے سے انکار کر دیا اور ایک خود مختار ملک کے طور پر ابھرا۔
-
قطر میں ایسا خاص کیا ہے؟
بادشاہی نظام
قطر میں انیسویں صدی سے بادشاہی نطام رائج ہے اور تب سے ہی یہاں الثانی خاندان بر سراقتدار ہے۔ قطر کے حالیہ امیر، شیخ تمیم بن حماد الثانی نے سن 2013 میں ملک کی قیادت اُس وقت سنبھالی تھی جب اُن کے والد شیخ حماد بن خلیفہ الثانی اپنے عہدے سے دستبردار ہو گئے تھے۔
مصنف: صائمہ حیدر
میڈیا رپورٹوں کے مطابق ماکروں نے جمعے کے دن دوحہ میں قطر کے امیر شیخ تمیم بن حمد الثانی سے ملاقات میں افغانستان میں مستقبل کی صورتحال کے حوالے سے گفتگو کی اور ساتھ ہی دیگر علاقائی اور عالمی امور پر تبادلہ خیال کیا۔
ماکروں اپنے دو روزہ دورہ گلف کے آخری دن یعنی بروز ہفتہ سعودی عرب روانہ ہو گئے۔ بتایا گیا ہے کہ وہ سعودی شہر جدہ میں کراؤن پرنس محمد بن سلمان سے ملیں گے۔ یاد رہے کہ سن دو ہزار اٹھارہ میں ترکی میں سعودی صحافی جمال خاشقجی کے قتل کے بعد پہلی مرتبہ کوئی مغربی رہنما محمد بن سلمان سے مل رہا ہے۔
اپنے اس دورے کی پہلی منزل دبئی میں ماکروں نے کہا کہ وہ جمال خاشقجی کے قتل کا واقعہ نہیں بھولے ہیں تاہم اس خطے کے اہم اور مضبوط ملک سعودی عرب سے انگیج ہوئے بغیر اس خطے سے کامیاب سفارتی کاری ممکن نہیں ہے۔ اس دورے کے دوران متحدہ عرب امارات نے فرانس کے ساتھ چودہ بلین ڈالر کی ایک ریکارڈ ڈیل کو بھی حتمی شکل دی ہے، جس کے تحت وہ فرانس سے 80 رافائل جنگی طیارے خریدے گا۔
ع ب ، ب ج (خبررساں ادارے)
-
قطر اور گلف تعاون کونسل، سالوں پر پھیلے اختلافات
کشیدہ تعلقات اور کرچی کرچی اعتماد
رواں برس پانچ جون کو سعودی عرب، بحرین، متحدہ عرب امارات اور مصر نے قطر پر دہشت گردی کی حمایت اور اپنے حریف ایران سے تعلقات کے فروغ کا الزام عائد کرتے ہوئے دوحہ سے تعلقات منقطع کر دیے تھے۔ دوحہ حکومت نے ان تمام الزامات کو مسترد کیا ہے۔ سعودی عرب اور اس کے اتحادیوں نے نہ صرف قطر پر پابندیاں عائد کیں بلکہ تعلقات کی بحالی کے لیے تیرہ مطالبات بھی پیش کیے۔ کویت فریقین کے درمیان ثالثی کی کوشش کر رہا ہے۔
-
قطر اور گلف تعاون کونسل، سالوں پر پھیلے اختلافات
خلیج تعاون کونسل بھی علاقائی عدم استحکام سے متاثر
پانچ مارچ سن 2014 میں بھی سعودی عرب، بحرین اور متحدہ عرب امارات نے اسلام پسند تنظیم اخوان المسلمون کے ساتھ تعاون پر قطر سے تعلقات منقطع کر دیے تھے۔ اخوان المسلمون کو بعض ممالک کے نزدیک دہشت گرد تنظیم خیال کیا جاتا ہے۔
-
قطر اور گلف تعاون کونسل، سالوں پر پھیلے اختلافات
عرب اسپرنگ اور خلیجی تعاون کونسل
سن 2011 میں تیونس سے شروع ہونے والی انقلابی تحریک کے بعد ایسی تحریکیں کئی عرب ممالک میں پھیل گئی تھیں تاہم’عرب بہار‘ نے جی سی سی رکن ریاستوں میں بغاوتوں کی قیادت نہیں کی تھی۔ سوائے بحرین کے جس نے سعودی فوجی مدد سے ملک میں ہونے والے شیعہ مظاہروں کو کچل ڈالا تھا۔
-
قطر اور گلف تعاون کونسل، سالوں پر پھیلے اختلافات
سکیورٹی ایگریمنٹ کی خلاف ورزی کا الزام
قطر پر سن 2013 میں ہونے والے خلیجی تعاون کونسل کے سکیورٹی ایگریمنٹ کی خلاف ورزی کا الزام عائد کیا گیا تھا۔ سعودی عرب اور اس کے اتحادی ممالک نے آٹھ ماہ کے شدید تناؤ کے بعد قطر میں اپنے سفارتخانے دوبارہ کھولنے پر اتفاق کیا تھا۔
-
قطر اور گلف تعاون کونسل، سالوں پر پھیلے اختلافات
پائپ لائن تنازعہ
سعودی عرب اور قطر کے درمیان تعلقات اُس وقت کم ترین سطح پر پہنچ گئے جب ریاض حکومت نے قطر کے کویت کے لیے ایک گیس پائپ لائن منصوبے کو نا منظور کر دیا۔ اسی سال سعودی حکومت نے قطری گیس اومان اور متحدہ عرب امارات لے جانے والے پہلے سے ایک طے شدہ پائپ لائن منصوبے پر بھی احتجاج کیا۔
-
قطر اور گلف تعاون کونسل، سالوں پر پھیلے اختلافات
سرحدی جھڑپ
سن 1992 میں سعودی عرب اور قطر کے مابین ایک سرحدی جھڑپ میں تین افراد ہلاک ہو گئے تھے۔ قطر نے دعوی کیا کہ ریاض نے خفوس کے مقام پر ایک سرحدی چوکی کو نشانہ بنایا۔ دوسر طرف سعودی عرب کا کہنا تھا کہ قطر نے اُس کے سرحدی علاقے پر حملہ کیا ہے۔
-
قطر اور گلف تعاون کونسل، سالوں پر پھیلے اختلافات
سرحدوں کے تنازعات
سن 1965 میں سعودی عرب اور قطر کے درمیان ان کی سرحدی حد بندی کے حوالے سے ایک معاہدہ طے پایا تھا تاہم یہ معاملہ کئی برس بعد بھی مکمل طور پر طے نہیں ہو سکا تھا۔ سن 1996 میں دونوں ممالک نے اس حوالے سے ایک معاہدے پر دستخط کیے تاہم اس کے مکمل نفاذ میں مزید ایک عشرے سے زیادہ کا عرصہ لگا۔
-
قطر اور گلف تعاون کونسل، سالوں پر پھیلے اختلافات
علاقائی تنازعات
سن 1991 میں دوحہ ہوار جزائر سے متعلق بحرین کے ساتھ ایک تنازعے کو اقوام متحدہ کی بین الاقوامی عدالت انصاف میں لے گیا۔ سن 1986 میں بھی دونوں ممالک کے درمیان سعودی عرب کی مداخلت کے باعث عسکری تصادم ہوتے ہوتے رہ گیا۔ بعد میں انٹرنیشنل کورٹ آف جسٹس نے بحرین کے حق میں فیصلہ دیا تھا جبکہ قطر کو جینن جزائر کی ملکیت دی گئی تھی۔
مصنف: اے ایف پی
