آسٹریلوی شہر میلبورن میں ٹینس کھیل کے رواں برس کے پہلے گرینڈ سلیم ٹورنامنٹ میں ہسپانوی کھلاڑی گاربینے موگوروسا نے پہلے سیٹ میں کامیابی حاصل کی تو ایسا محسوس ہوا کہ وہ یہ فائنل میچ آسانی جیت لیں گی۔ لیکن امریکی کھلاڑی صوفیہ کینن نے اندازوں کو غلط ثابت کر دیا۔ انہوں نے دوسرا سیٹ جیت کر اپنی کامیابی کی بنیاد رکھ دی۔
کینن نے ویمن سنگلز چیمپیئن شپ کے فائنل میچ کا دوسرا سیٹ چھ دو سے جیتا جب کہ پہلا سیٹ وہ چھ چار سے ہار گئی تھیں۔ تیسرے سیٹ میں انہوں نے ابتدائی دو گیمز جیت کر شائقین کو حیران کر دیا۔
اس برتری کو چھبیس سالہ موگوروسا نے برابر کر دیا۔ لیکن اگلی گیمز میں کینن نے اپنے زوردار کھیل سے اُس تاثر کو بھی زائل کر دیا کہ یہ سیٹ خاصا کانٹے دار رہ سکتا ہے۔ انہوں نے اپنی پرفارمنس سے اپنی مدمقابل کو بے بس کر دیا۔
ہسپانوی کھلاڑی گاربینے موزوروسا شکست کے بعد
گاربینے اپنی حریف کے مقابلے میں زیادہ غلطیاں کرنے کی مرتکب بھی ہوئیں اور یہی ان کے شکست کا سبب بنا۔ مبصرین کا خیال ہے کہ سابق عالمی نمبر ایک فائنل میچ میں پوری طرح فٹ دکھائی نہیں دے رہی تھیں۔
انجام کار امریکی کھلاڑی نے ہسپانیہ کی گاربینے موگوروسا کو تین سیٹ کے میچ میں سے دو سیٹ جیت کر شکست سے دوچار کر دیا۔ اس طرح وہ آسٹریلین اوپن کی نئی چیمپیئن بن گئی ہیں۔ انہوں نے یہ میچ چار چھ، چھ دو اور چھ دو سے جیتا۔
اکیس سالہ امریکی کھلاڑی کینن کی عالمی درجہ بندی میں پوزیشن چودہویں تھی۔ اس فائنل میچ کے بعد وہ ٹاپ ٹین میں جگہ بنا لیں گی۔ موگوروسا انجریز کی وجہ سے مختلف رینکنگ ٹورنامنٹ سے باہر تھیں۔ وہ اس ٹورنامنٹ میں شرکت سے قبل عالمی رینکنگ میں بتسیواں مقام رکھتی تھیں۔
ع ح ⁄ ش ح ( اے ایف پی،روئٹرز)
-
2020ء میں کھیلوں کے بڑے مقابلے کون کون سے؟
اے ٹی پی کپ، تین سے بارہ جنوری
اس ٹورنامنٹ کے ساتھ آسٹریلین اوپن سے قبل ہی ٹینس کے رواں برس کے سیزن کا آغاز ہو جائے گا۔ یہ نیا ٹیم ٹورنامنٹ ہے، جو ہاڈر کورٹ پر کھیلا جائے گا۔ اس میں دنیائے ٹینس کے معروف کھلاڑی راجر فیڈرر، نوواک جوکووچ اور رافائل نادال جیسے کھلاڑی بھی حصہ لیں گے۔ اس ٹورنامنٹ کا فائنل سڈنی میں ہوگا۔
-
2020ء میں کھیلوں کے بڑے مقابلے کون کون سے؟
سپر باؤل، دو فروری
امریکا میں میامی میں اس مرتبہ 54 واں سپر باؤل منقعد ہو گا۔ نیو انگلینڈ پیٹریاٹس کی ٹیم گزشتہ چھ برسوں کے دوران پانچویں مرتبہ اپنے اعزاز کا دفاع کرے گی۔ کوچ بل بیلیچک کی اس ٹیم نے پورے سیزن میں متاثر کن کارکردگی کا مظاہرہ کیا ہے۔
-
2020ء میں کھیلوں کے بڑے مقابلے کون کون سے؟
کرکٹ، ٹی ٹوئنٹی ورلڈ کپ
مردوں اور خواتین کی کرکٹ ٹیمیں اس سال آسٹریلیا میں ٹی ٹوئٹنی ورلڈ کپ کے میچ کھیلیں گی۔ خواتین کے مقابلے اکیس فروری سے آٹھ مارچ تک جاری رہیں گے جبکہ مردوں کا ٹی ٹوئنٹی ورلڈ کپ اٹھارہ اکتوبر کو شروع ہو گا اور پندرہ نومبر تک کھیلا جائے گا۔
-
2020ء میں کھیلوں کے بڑے مقابلے کون کون سے؟
موٹر ریسنگ، ویتنام گراں پری
ویتنام میں تاریخ کی پہلی گراں پری ریس منعقد ہو گی۔ فارمولا ون کے سالانہ سیزن کی یہ تیسری ریس ملکی دارالحکومت ہنوئے کے سٹریٹ سرکٹ پر منعقد ہو گی۔ لوئس ہیملٹن اور مرسیڈیز دونوں نے 2019ء میں چھٹی مرتبہ عالمی چیمپئن شپ جیتی تھی اور اس سال بھی ان دونوں کی کامیابی کے امکانات روشن ہیں۔ اس کے علاوہ اس سال 1985ء کے بعد ہالینڈ بھی پہلی مرتبہ ایک گراں پری ریس کی میزبانی کرے گا۔
-
2020ء میں کھیلوں کے بڑے مقابلے کون کون سے؟
خواتین کی چیپمئنز لیگ، فائنل 24 مئی کو
فرانسیسی فٹ بال کلب اولمپک لیوں کی ٹیم ویانا کے ویئولا پارک اسٹیڈیم میں اس سال لگاتار پانچویں مرتبہ اپنے اعزاز کا کامیابی سے دفاع کر سکتی ہے۔ اس اسٹیڈیم میں تقریباً ساڑھے سترہ ہزار شائقین کے بیٹھنے کی گنجائش ہے۔
-
2020ء میں کھیلوں کے بڑے مقابلے کون کون سے؟
فٹ بال کا یورو کپ
اس سال فٹ بال کی سولہویں یورپی چیمپئن شپ بارہ جون سے شروع ہو کر بارہ جولائی تک جاری رہے گی۔ یہ ایسا پہلا یورپی چیمپئن شپ فٹ بال ٹورنامنٹ ہو گا، جس میں پرتگال اپنے اعزاز کا دفاع کرے گا اور جو ایک ساتھ بارہ ممالک میں منعقد ہو گا۔ پرتگال کی ٹیم جرمنی اور عالمی چیمپئن فرانس کے ساتھ ایک ہی گروپ میں ہے۔ اس ٹورنامنٹ کا فائنل لندن میں کھیلا جائے گا۔
-
2020ء میں کھیلوں کے بڑے مقابلے کون کون سے؟
سائیکلنگ، ٹور ڈی فرانس
سائیکلنگ کی غیر اعلانیہ عالمی چیمپئن شپ 27 جون کو نیس سے شروع ہو گی۔ 1981ء کے بعد یہ پہلا موقع ہے کہ اس ریس کی ابتدا اس شہر سے ہو رہی ہے۔ سائیکل سوار اکیس مراحل کے دوران تقریباً ساڑھے تین ہزار کلومیٹر کا فاصلہ طے کریں گے۔ یہ ریس 19جولائی کو اپنے اختتام کو پہنچے گی۔
-
2020ء میں کھیلوں کے بڑے مقابلے کون کون سے؟
ٹوکیو اولمپکس
24 جولائی کو اولمپک مقابلوں کا افتتاح ٹوکیو کے نئے نیشنل اسٹیڈیم میں کیا جائے گا۔ یہ اسٹیڈیم اسی جگہ تعمیر کیا گیا ہے، جہاں 1964ء کے اولمپکس ہوئے تھے۔ ان میں 339 تمغوں کے حصول کی دوڑ میں 11 ہزار کھلاڑی حصہ لیں گے۔ اس مرتبہ ان میں بیس بال، کراٹے، اسکیٹ بورڈنگ، اسپورٹس کلائمبنگ اور سرفنگ کو بھی شامل کیا گیا ہے۔ ٹوکیو اولمپکس نو اگست تک جاری رہیں گے۔ 2016ء کے اولمپکس میں جاپان چھٹے نمبر پر رہا تھا۔
-
2020ء میں کھیلوں کے بڑے مقابلے کون کون سے؟
ٹوکیو پیرالمپکس
پیرالمپکس کی مقبولیت دن بہ دن بڑھتی جا رہی ہے اور ممکن ہے کہ ٹوکیو پیرالمپکس کو بھی بہت پسند کیا جائے۔ کھیلوں کے ان مقابلوں میں چار ہزار ایتھلیٹ حصہ لیں گے۔ بائیس مختلف شعبوں میں 540 سے زائد مقابلوں کا اہتمام کیا جائے گا۔ 2016ء کے ایسے مقابلوں میں تمغوں کے اعتبار سے چین سرفہرست رہا تھا۔ امسالہ پیرالمپکس پچیس اگست سے چھ سمتبر تک جاری رہیں گے۔
-
2020ء میں کھیلوں کے بڑے مقابلے کون کون سے؟
گولف، رائڈر کپ
گولف کا یہ ٹورنامنٹ انفرادی سطح پر نہیں بلکہ ٹیم کی صورت میں کھیلا جاتا ہے۔ اس مرتبہ یہ مقابلے امریکی ریاست وسکونسن میں پچیس سے ستائیس ستمبر تک جاری رہیں گے اور امریکی ٹیم کو اس کا فائدہ ہو سکتا ہے۔ میزبان ٹیم کی قیادت اسٹیو اسٹریکر کریں گے۔ اس ٹورنامنٹ میں یورپی اور امریکی ٹیموں کے مابین مقابلوں کو اہم ترین سمجھا جاتا ہے۔
-
2020ء میں کھیلوں کے بڑے مقابلے کون کون سے؟
ٹینس، یو ایس اوپن
امریکی کھلاڑی سیرینا ولیمز کی نظریں آسٹریلوی ٹینس کھلاڑی مارگریٹ کورٹس کے چوبیس گرینڈ سیلم ٹائٹل جیتنے کے ریکارڈ کو توڑنے پر لگی ہوئی ہیں۔ سیرینا اب تک تیئیس گرینڈ سیلم ٹائٹل جیت چکی ہیں۔ اڑتیس سالہ سیرینا پچھلے دو یو ایس اوپن کے فائنلز تک پہنچنے میں کامیاب رہی تھیں۔ کیا یہ ان کے لیے آخری موقع ہو گا، یہ دیکھنا ابھی باقی ہے۔ یو ایس اوپن مقابلے اکتیس اگست سے تیرہ ستمبر تک نیو یارک میں ہوں گے۔
-
2020ء میں کھیلوں کے بڑے مقابلے کون کون سے؟
یورپی ہینڈ بال چیمپئن شپ
2020ء میں ہینڈ بال کی یورپی چیمپئن شپ آسٹریا، سویڈن اور ناروے میں دس سے چھبیس جنوری تک کھیلی جائے گی۔ جرمن مردوں کی ٹیم نے آخری مرتبہ 2016ء میں یہ ٹورنامنٹ جیتا تھا۔ یہ ٹورنامنٹ ہر دو سال بعد منعقد کیا جاتا ہے۔ ٹوکیو اولمپکس کے بعد دسمبر میں خواتین کی یورپی ہینڈ بال چیمپئن شپ ناروے اور ڈنمارک میں ہو گی۔
