پيرس حملوں ميں ہلاک ہونے والوں کو اوباما کا خراج عقيدت

ماحولياتی تبديليوں کے موضوع پر پيرس ميں ہونے والی انتہائی اہم عالمی سمٹ ميں شرکت کے ليے پير کی صبح وہاں آمد کے فوراً بعد امريکی صدر نے پيرس کے بٹاکلان کانسرٹ ہال کا رخ کيا۔ اوباما دہشت گردانہ حملوں کے جائے وقوعہ پر خاموش کھڑے ہو کر وہاں رکھے پھولوں کے گلدستوں اور پرچموں کو ديکھتے رہے اور انہوں نے ہلاک شدگان کو خراج عقيدت پيش کيا۔

اسی ماہ تيرہ نومبر کے روز جہاديوں کے ايک گروپ نے پيرس ميں مختلف مقامات پر خونريز حملے کيے۔ AK-47 رائفلز اور خود کش جيکٹوں سے ليس حملہ آوروں نے بٹاکلان کانسرٹ ہال ميں جاری ايک تقريب کے دوران کارروائی کرتے ہوئے کم از کم نوے افراد کو ہلاک کر ديا۔ اس روز فرانسيسی دارالحکومت ميں متعدد مقامات پر منظم حملے کيے گئے، جن ميں مجموعی طور پر قريب 130 افراد ہلاک ہوئے۔ اس واقعے کو فرانس ميں دوسری عالمی جنگ کے بعد سب سے خونريز کارروائی قرار ديا جا رہا ہے۔

امريکی صدر نے پير کی صبح بٹاکلان کانسرٹ ہال کا دورہ فرانسيسی صدر فرانسوا اولانڈ کے ہمراہ کيا۔ وہ اس مختصر دورے ميں زيادہ تر خاموش کھڑے رہے اور انہوں نے ہلاک شدگان کی ياد ميں ايک گلاب کا پھول وقوعہ پر رکھا۔ سکيورٹی خدشات کے سبب اوباما کے اس دورے کو خفيہ رکھا گيا تھا۔

حملوں کے بعد سے بٹاکلان ہال افسوس کا اظہار کرنے والوں کے ليے ايک اہم مقام بنا ہوا ہے۔ اب تک برطانيہ، کينيڈا اور چلی کے اعلی عہديداران کے علاوہ آئرلينڈ کے ميوزک بينڈ يو ٹو کے ارکان وہاں کا دورہ کر چکے ہيں۔ اس کے علاوہ ہزاروں کی تعداد ميں شہری بھی روزانہ وہاں اظہار افسوس کرتے ہيں۔ جاپانی وزير اعظم شينزو آبے نے بھی اتوار کے روز اس مقام پر پھول چڑھائے تھے۔

نومبر کے وسط ميں ہونے والے ان دہشت گردانہ واقعات کے بعد سے امريکی صدر نے فرانس کے ساتھ تعلقات اور تعاون و دوستی بڑھا دی ہے۔ اوباما نے سماجی رابطوں کی ويب سائٹ فيس بک پر اپنی ايک تحرير ميں لکھا، ’’فرانس ميں ماحوليات کے موضوع پر ہونے والی اس سمٹ ميں شرکت، حاليہ واقعات کے بعد اپنے سب سے پرانے اتحادی کے ساتھ اظہار يکجہتی کا ايک موقع ہے۔‘‘