پاکستان کو برسبین ون ڈے میں پانچ وکٹوں سے شکست

آسٹریلوی شہر برسبین میں پاکستانی ٹیم نے پہلے بیٹنگ کرتے ہوئے سلمان بٹ کی نصف سنچری، اور یونس خان اور شاہد آفریدی کی خاطر خواہ کارکردگی کی بدولت انچاس اوورز اور چار گیندوں میں 274 رنز بنائے۔ جواب میں آسٹریلیا نے 275 کے بظاہر مشکل ہدف کا آسانی سے تعاقب کیا۔ مین آف دی میچ آسٹریلوی بیٹسمین کیمرون وائٹ نے سنچری سکور کر کے اپنی ٹیم کو جیت دلانے میں کلیدی کردار ادا کیا۔

ٹیسٹ سیریز کے مقابلے میں پاکستانی کرکٹرز ون ڈے سیریز میں جارحانہ نظر آئے۔ بوم بوم آفریدی اور سابق کپتان یونس خان کی واپسی سے ٹیم میں ایک نئی سپرٹ دکھائی دی۔

پاکستان کی طرف سے اوپنرز کامران اکمل اور سلمان بٹ نے پہلی وکٹ کی شراکت میں قیمتی 62 رنز جوڑے، اکمل 34 رنز بنا کر شین واٹسن کی گیند پر آوٴٹ ہوئے۔

سلمان بٹ نے اپنی ٹیسٹ فارم کو جاری رکھتے ہوئے سیریز کے پہلے ون ڈے میں 72 رنز، یونس خان نے اپنے کم بیک میچ میں 46، شاہد آفریدی نے محض 26 گیندوں پر جارحانہ انداز میں 48 اور شعیب ملک نے 28 رنز بنائے۔ کپتان محمد یوسف کی خراب فارم جاری رہی، وہ محض دو رنز بناکر آوٴٹ ہو گئے۔ آسٹریلیا کی جانب سے شین واٹسن نے اپنے دس اوورز میں 36 رنز کے عوض چار اہم وکٹیں حاصل کیں۔

ہدف کا تعاقب کرتے ہوئے آسٹریلیا کا آغاز اچھا نہیں رہا۔ اوپنر واٹسن پانچ جبکہ مارش 15 رنز بنا کر پویلین لوٹ گئے۔ آسٹریلیا نے 37 کے مجموعی سکور پر اپنے دونوں اوپنرز کی وکٹیں گنوا دی تھیں۔ اس کے بعد مائیکل کلارک اور کپتان رکی پونٹنگ نے اننگز کو سنبھالا لیکن 84 کے مجموعی سکور پر 18 ویں اوور میں کپتان پونٹنگ شاہد آفریدی کا شکار بنے۔ اس وقت آسٹریلیا کے لئے میچ جیتنا مشکل لگا لیکن پھر کیمرون وائٹ نے مائیکل کلارک کے ساتھ پارٹنرشپ میں 102 قیمتی رنز جوڑے۔ کلارک نصف سنچری بناکر آوٴٹ ہوگئے جبکہ وائٹ نے سنچری بنائی۔ پاکستان کی طرف سے محمد عامر، محمد آصف، نویدالحسن رانا اور شاہد آفریدی نے ایک ایک وکٹ حاصل کی۔

دونوں ٹیموں کے درمیان پانچ میچوں پر مشتمل ون ڈے سیریز کا دوسرا میچ 24 جنوری کو سڈنی میں کھیلا جائے گا۔ یہ وہی میدان ہے، جہاں پاکستان جیتا ہوا ٹیسٹ میچ 36 رنز سے ہار گیا تھا۔

رپورٹ: گوہر نذیر گیلانی/خبر رساں ادارے

ادارت: امجد علی