مس ورلڈ کے اسٹیج پر بھارتی حسیناؤں کا بول بالا

’مس ورلڈ‘ کا 67 واں اعزاز بھارتی ریاست ہریانہ کی مس انڈیا منوشی چھلر جیت کر ایسی چھٹی بھارتی حسینہ بن گئی ہیں۔ دنیا کی حسین ترین خواتین کے مقابلے میں وینیزویلا کے بعد بھارت اب چھ مس ورلڈ ٹائٹل کے ساتھ دوسرا ملک بن گیا ہے۔

بھارت کے لیے عالمی مقابلہ حسن میں جیت کے سفر کا آغاز سنہ 1966 سے ہوا۔ لندن میں ریٹا فاریا نے پہلی مرتبہ بھارت کے لیے مس ورلڈ کا اعزاز جیتا تھا۔ ریٹا نے بالی وڈ میں اداکاری کے جوہر تو نہیں دکھائے لیکن حسین خواتین کےمختلف مقابلوں میں بحیثیت جج فرائض انجام دیے۔

ملکہ بالی وڈ ایشوریا رائے بچن سن 1994 میں مس انڈیا کے مقابلہ میں رنر اپ رہیں تھی۔ تاہم وہ اسی سال میں مس ورلڈ کا خطاب حاصل کرنے میں کامیاب رہیں۔ اکیس سالہ ایشوریا ان دنوں آرکیٹیکچر کی طالبہ تھی۔ مس ورلڈ کے اعزاز نے ان کی زندگی کا رخ بدلہ اور وہ بالی وڈ کی کامیاب ترین اداکارہ بن کر سامنے آئیں۔

ریٹا فاریا اور ایشوریا رائے کے بعد ڈیانا ہیڈن نے بھارت کے لیے مس ورلڈ کا تیسرا اعزاز حاصل کیا۔ ڈیانا نے بھی بالی وڈ نگری میں اپنی قسمت آزمائی لیکن کامیاب نہ ہو پائیں۔

یوکتا مُکھی جب مس ورلڈ بنیں تو ان کی عمر فقط بائیس سال تھی۔ سابقہ بھارتی مس ورلڈ حسیناؤں کی طرح یوکتا نے بھی بالی وڈ میں قدم رکھا۔ تاہم یوکتا مکھی کی فلمیں باکس آفس پر زیادہ دیر نہ ٹِک سکیں۔

سن 2000 میں مس ورلڈ کا اعزاز حاصل کرنے والی پریانکا چوپڑا اپنے فلمی کیرئر کے آغاز پر کچھ خاص کامیاب نہیں رہیں۔ پریانکا نے اپنی محنت اور لگن سے بالی وڈ میں بالآخرکامیابی کی سیڑھیاں چڑھیں۔ پُر کشش مسکراہٹ رکھنے والی پریانکا اب نہ صرف بالی وڈ بلکہ ہالی وڈ میں منجھی ہوئی اداکارہ مانی جاتی ہیں۔

بیس سالہ منوشی چِھلر کی تاج پوشی پورٹو ریکو سے تعلق رکھنے والی سابقہ مس ورلڈ سٹیفانی ڈیل والا نے کی۔ چین میں منعقدہ مس ورلڈ کے مقابلے میں 108 حسیناؤں میں فاتح حسینہ منوشی کے بعد رنر اپ میکسیکو سے آندریا میزا رہیں۔ جب کہ تیسرا نمبر برطانیہ کی سٹیفنی ہل کا رہا۔