مالاکنڈ آپریشن: شدید لڑائی جاری

پہلی مرتبہ سوات میں طالبان کے اہم مرکز گھٹ پیوچار پر شیلنگ کی گئی ہے جب کہ طالبان نے تحصیل مٹہ میں پولیس سٹیشن پرحملہ کیا ہے۔ بھاری ہتھیار سے فائرنگ کے تبادلے کے دوران عسکریت پسندوں کے اہم کمانڈر ابن امین کے بھائی ابن عقیل اپنے کئی ساتھیوں سمیت ہلاک ہوگئے ہیں۔سیکورٹی فورسز نے مٹہ میں مکمل کرفیو ناذ کردیا ہے۔

اسی طرح ضلع دیر میں عسکریت پسندوں کے خلاف آپریشن کے دوران تحریک نفاذ شریعت محمدی کے سربراہ مولانا صوفی محمد کے بڑے صاحبزادے کفایت اللہ ہلاک جب کہ ان کے بہنوئی اور تین سیکورٹی گارڈز شدید زخمی ہوئے ہیں۔ سیکورٹی فورسز کی کارروائیوں کے ردعمل میں عسکریت پسندوں نے بھی سوات اور دیر میں سرکاری املاک کو تباہ کرنے کے ساتھ ساتھ سرکاری اہلکاروں کو نشانہ بنایا ہے۔

چکدرہ میں پیرا ملٹری فورسز کے ہیڈ کوارٹر پر عسکریت پسندوں نےحملہ کر کے تین سیکورٹی اہلکاروں کو ہلاک جب کہ گیارہ کو یرغمال بنا کر نامعلوم مقام منتقل کر دیا ہے۔

سیکورٹی فورسز کی جانب سے آپریشن اور عسکریت پسندوں کی کاروائیوں کے بارے میں سابق داخلہ سیکرٹری بریگیڈئیر (ر) محمودشاہ کا کہنا ہے کہ وہ پہلے ہی کہتے تھے کہ طالبان قبائلی علاقوں تک محدود نہیں رہیں گے اور ایسا ہی ہوا کہ یہ قبائلی علاقوں سے بندوبستی علاقوں میں کاروائیاں کرتے رہے اور پھر انہوں نے سوات کا رخ کیا جہاں سے دیر اور بونیر تک پھیل گئے۔ ان کا موقف ہے کہ اگرحکومت یہاں پر ان کا راستہ روکنے میں ناکام رہی تو انہیں مزید علاقوں تک پھیلنے سے کوئی نہیں روک سکتا۔ ان کا کہنا تھا کہ حکومت کو آپریشن کے بعد اسی نظام عدل کے تحت لوگوں کو عدالتوں میں لاکر انہیں اپنی بے گناہی ثابت کرنے کا موقع دینا چاہیے کیوں کہ طالبان علاقے میں بے گناہ لوگوں کا خون بہا چکے ہیں۔

ضلع سوات میں تختہ بند، گھٹ پیوچار، بلو گرام اور دیگرعلاقوں میں عسکریت پسندوں کے ٹھکانوں پر بمباری کی گئی ہے جب کہ طالبان کا مالاکنڈ کے کمشنر اور پولیس افسران کے دفاتر پر بدستور قبضہ ہے۔ مینگورہ سے ملنے والی اطلاعات کے مطابق شہر پر اب بھی طالبان کا قبضہ ہے۔ سوات سمیت بونیر اور دیر میں بھی سیکورٹی فورسز اور عسکریت پسندوں کے مابین جھڑپیں جاری ہیں جس میں بڑے پیمانے پر ہلاکتوں کاخدشہ ہے۔

ملاکنڈ ڈویژن کے تین اضلاع میں عسکریت پسندوں کے خلاف آپریشن سے لاکھوں شہری نقل مکانی کرچکے ہیں۔ صوبائی حکومت کے اعداد و شمار کے مطابق اب تک پانچ لاکھ سے زیادہ لوگ بے گھر ہوئے ہیں جب کہ اتنی ہی تعدادمیں لوگ نقل مکانی کے منتظر ہیں۔ یہ لوگ کرفیو کی وجہ سے عسکریت پسندوں اور فوج کے درمیان پھنس گئے ہیں۔

دیگر عالمی اداروں کی طرح انٹرنیشنل کمیٹی آف ریڈ کراس نے بڑے پیمانے پر نقل مکانی پر انسانی بحران کے خدشات کااظہارکیا ہے۔ آئی سی آر سی پشاور کے ترجمان بینو کوچز کا کہنا ہے کہ صوبائی حکومت کے ساتھ مل کر اب تک ایک لاکھ افراد کو امداد فراہم کرچکے ہیں تاہم شورش کی وجہ سے دور دراز علاقوں تک رسائی ممکن نہیں ہے۔ یہ بات قابل ذکر ہے کہ مٹہ اور خوازہ خیلہ میں جھڑپوں کے دوران مرنے والوں کی نعشیں سڑکوں کے کنارے پڑی ہیں تاہم کرفیو کی وجہ سے ان کو کوئی اٹھانے نہیں آسکتا۔