غزہ پر اسرائیلی حملے جاری، 300سے زائد ہلاک
29 دسمبر 2008
اقوام متحدہ کی ایجنسی برائے امداد UNRWA کے مطابق اسرائیل کے فضائی حملوں میں ہلاک ہونے والوں میں متعدد شہری بھی شامل ہیں۔ UNRWA نے ہسپتال اور طبی ذرائع کا حوالہ دیتے ہوئے شہریوں کی ہلاکتوں میں اضافے کا خدشہ ظاہر کیا ہے۔ ایک محتاط اندازے کے مطابق غزہ پر اسرائیل کے فضائی حملوں میں اب تک تقریباً ایک سو شہری ہلاک ہوگئے ہیں۔
غزہ پر کنٹرول کرنے والی تنظیم حماس تحریک نے اسرائیل کے حملوں کا بھرپور جواب دینے کے عزم کا اعادہ کیا ہے۔
فلسطینی ذرائع کے مطابق اسرائیلی طیاروں نے آج پیر کو غزہ کی وزارت داخلہ کی عمارت پر حملے کئے ہیں تاہم ان میں جانی نقصان ہوا ہے یا نہیں اس بارے میں تفصیلات موجود نہیں ہیں۔
اقوام متحدہ کی سلامتی کونسل نے تشّدد کے خاتمے کا پُر زور مطالبہ کیا ہے لیکن امریکی صدر جارج بُش کی انتظامیہ نے حماس پر تنقید کرتے ہوئے کہا ہے کہ اسے جلد فائر بندی پر راضی ہوجانا چاہیے۔
دوسری طرف مصری وزیر خارجہ احمد ابو الغیط نے ترکی کے دورے پر کہا ہے کہ اسرائیل کو ’’ فلسطینیوں کے خلاف ہلاکت خیز کارروائیاں بند کردینی چاہیں۔‘‘