صدام حسین کی پھانسی کے بعد

اگرچہ صدام حسین کی موت کے بعد سے اب تک عراق میں ایک بار پھر درجنوں انسان موت کا شکار ہو چکے ہیں تاہم پُر تشدد واقعات میں جس ہولناک اور غیر معمولی اضافے کا خدشہ تھا، وہ دیکھنے میں نہیں آیا۔ مبصرین کے خیال میں اِس کی وجہ یہ ہے کہ لوگ پہلے سے اِس کی توقع کر رہے تھے۔ خلاف ِ توقع عرب ملکوں کے دارالحکومتوں میں بھی لوگ سڑکوں پرنہیں نکلے۔

اِسی دوران سالِ نو کے موقع پر عراق میں مرنے والے امریکی فوجیوں کی تعداد کم از کم تین ہزار ہو گئی۔ اِس کے باوجود اپنے سالِ نو کے پیغام میں امریکی صدر جورج ڈبلیو بُش نے کہا ہے کہ عراق میں ”آزادی کے دشمنوں کے خلاف جنگ“ جاری رہے گی اور امریکہ ایک آزاد اور متحد عراق کے لئے اپنی کوششیں جاری رکھے گا۔