روس، یورپ گیس پائپ لائن؟
13 نومبر 2008روسی وزیر اعظم کا کہنا تھا کہ اس ضمن میں یورپ کی جانب سے مزید تعاون کی ضرورت ہے۔ سات اعشاریہ چار بلین یوروکی لاگت سے شروع کی جانے والی یہ گیس پائپ لائن معاہدے کے مطابق پولینڈ سے گزرتی ہوئی بالٹک ریاستوں کی جانب جانا تھی۔
بعض مبصرین کے مطابق روس کا پائپ لائن کے منصوبے کو ملتوی کرنا شاید امریکی میزائل شکن نظام کی پولینڈ میں تنصیب پر ردعمل ہے۔ امریکی میزائل منصوبے پرروس اپنی سلامتی کے لئے خطرہ قرار دے چکا ہے۔
دوسری جانب امریکی وزیردفاع رابرٹ گیٹس نے کہاہے کہ مشرقی یورپ میں دفاعی میزائل نظام کے منصوبے کو ختم کرنے کی روسی تجویز قابل قبول نہیں۔ اسٹونیا کے شہر TALLINN میں انہوں نے صحافیوں سے گفتگو کرتے ہوئے روس کے مشرقی یورپ میں نیٹو ممالک کی سرحد پر میزائل نصب کرنے کے اعلان پر سخت تنقید کی۔
اس سے قبل روسی صدر دمتری میدویدیف نے کہا تھا کہ اگر امریکہ مشرقی یورپ میں میزائل دفاعی نظام کی تنصیب کا منصوبہ ختم کر دے تو روس اپنی مغربی سرحدوں پرمیزائلوں کی تنصب کا پروگرام ترک کردے گا۔